Lindita Çela

Provat  shkencore zbulojnë autorin e vrasjes së Fatbardha Tafës, në Qershor doli nga burgu. Policia dyshon që ditën e ngjarjes, e liron për të siguruar provat. I dyshuari nuk pranon krimin.

Aldo Hoxha, i vlerësuar si  njeri me rrezikshmëri të lartë, që gjykata e dënon me vetëm një vit burg, është autori i dyshuar për vrasjen e Fatbardha Hoxhës. Policia e kryeqytetit ka arrestuar dje 20-vjeçarin, si personin e vetëm të dyshuar autor të ngjarjes më 7 gusht në afërsi të fushës së Aviacionit. Aldo Hoxha nuk ka pranuar  autorësinë e vrasjes, por burime të policisë bëjnë me dije se ekzistojnë prova shkencore që implikojnë atë në vrasjen e 37-vjeçares dhe plagosjes së të motrës.

Precedenti

Aldo Hoxha është person mjaft i njohur për Policinë e Shtetit. Madje, në bazë të dokumenteve zyrtare ai rezulton të ketë dalë nga burgu, në qershor të këtij viti, një muaj para se të vriste Fatbardha Tafën për t’i rrëmbyer varësen e floririt. Ka qenë ndër personat e parë të dyshuar, por është liruar për mungesë të provave. Burime nga policia bëjnë të ditur se për shkak të së shkuarës së tij kriminale, por dhe dyshimeve të lindura në vendngjarje, Aldo Hoxha është mbajtur në vëzhgimin e agjentëve të policisë.  Nëpërmjet mënyrave speciale të hetimit, por edhe të vëzhgimit, oficerët e krimeve kanë mundur të identifikojnë Hoxhën si autor të vrasjes. Operacioni sekret është koduar “Loja e rreme”. Vetëm kur është bërë e mundur gjetja e provave, si rrobat dhe kapelja ku janë gjetur njolla gjaku të viktimës, është vendosur arrestimi i tij. Provat ndaj 20-vjeçarit nga Çekreza, mesa duket kanë bindur oficerët e Policisë Gjyqësore dhe drejtuesit e Policisë së Tiranës, që t’i kërkojnë Prokurorisë masën e arrestit ndaj këtij personi, nën akuzën e vrasjes për vjedhje të Fatbardha Tafës. Ndërkohë është ndaluar edhe një person tjetër, me iniciale J.B, i dyshuar si bashkëpunëtor i tij.

Provat
“Kam qenë në shtëpi, nuk kam lëvizur fare nga banesa. Nuk e kam kryer unë krimin. Jam i pafajshëm”. Këto kanë qenë kundërshtimet që Aldo Hoxha ka ripërsëritur për oficerët e policisë gjyqësore, duke mohuar  të ketë lidhje me ngjarjen që tronditi opinionin publik pesë ditë më parë. Por, megjithëse ka mohuar autorësinë e vrasjes, burime nga grupi hetimor bëjnë të ditur se 20-vjeçari ka rrëfyer një alibi jo të besueshne. Hoxha ka thënë se gjatë orëve që ka ndodhur krimi ka qenë në banesën e tij, ndërkohë që askush nuk e vërteton këtë alibi. Por, duket se ka qenë edhe përgjigjja e laboratorit të Policisë Shkencore që ka ndihmuar strukturat e policisë për të ngritur akuzën ndaj 20-vjeçarit, për të cilin ka dyshime të forta se është implikuar në vrasjen 37-vjeçares. Nga ekspertiza, ka rezultuar se fija e flokut të tij dhe djersa janë gjetur në trupin e viktimës. Ndërsa tek kapelja e tij jeshile ka pasur njolla gjaku të një grupi me të viktimës. Këto kanë që prova të forta për ta ndaluar 20-vjeçarin, megjithëse hetimet për këtë ngjarje vazhdojnë. Grupi i grabitësve përbëhej nga tre vetë, dy që ishin mbi motor dhe një i mitur që i ndihmoi të largoheshin. Policia është në ndjekje të personit të tretë.

Paraqitja për njohje

Për identifikimin e tij janë marrë dje në pyetje edhe Lumturie Gjana, motra e plagosur e viktimës së bashku me djalin 13-vjeçar. Mësohet se Gjana ka dëshmuar rreth dy orë në polici për ngjarjen. Megjithëse ka ngritur gishtin ndaj Aldo Hoxhës, dëshmia e saj duket se nuk ka qenë fort bindëse për oficerët e policisë dhe prokurorinë të cilët akuzën për arrestimin e Aldo Hoxhës e kanë mbështetur tek provat shkencore të siguruara nga vendngjarja dhe ato të laboratorit të kriminalistikës.


Skandali i drejtësisë: A. Hoxha vjedh, dhunon, mban “Kallashnikov”, mban marijuanë, por merr dënim të zbutur

Qëllon me armë, mban drogë, gjykatësja i jep vetëm 1 vit burg

Nëse je i varfër, tregon pendesë dhe sillesh mirë, gjykatat shqiptare tregohen të mëshirshme. Nuk të dënojnë as kur Kodi i Procedurës Penale të heq 7 vjet lirinë dhe je person me precedent penal. Kështu ka ndodhur me Aldo Hoxhën, njeriun e akuzuar për një sërë veprash penale dhe vrasësin e Fatbardha Tafës. Megjithëse e cilëson si person me rrezikshmëri të lartë, kjo nuk e ka penguar aspak gjykatësen Adriana Bera të dënojë Aldo Hoxhën me një vit burg. Personi që me 7 gusht, në afërsi të Fushës së Aviacionit ekzekutoi Fatbardha Tafën, rezulton të jetë jo vetëm njeri problematik për rendin, por edhe i dënuar për armëmbajtje pa leje, vjedhje dhe posedim të lëndës narkotike.

Kundërshton policinë me armë, prapë i lirë

Është i gjykuar për vjedhje me dhunë, ndërkohë që nga policia njihet edhe si përdorues droge. Por, megjithëse emri i 20-vjeçarit është në skedën e zezë të policisë, Hoxha ka shpëtuar paq nga burgu. Madje, edhe për akuzën më të fundit të tij, vjedhje me dhunë, çështja vazhdon të gjykohet në gjendje të lirë. Ndërsa për një ngjarje tjetër të rëndë, Aldo Hoxha u dënua vetëm më një vit burg. Më 27 qershor të 2011, rreth orës 22.30,  në zonën e ish-fushës së Aviacionit, si pasojë e një konflikti ka patur shkëmbime zjarri. Policia e Shtetit ka identifikuar të pandehurin Aldo Hoxha si personi që kishte qëlluar e është kapur në flagrance nga shërbimet e Policisë ku i është sekuestruar arma e zjarrit automatike “Kallashnikov”. Në vendngjarje janë gjetur dy gëzhoja, të cilat pas ekspertimit balistik kanë rezultuar gëzhoja kallashnikovi të cilat ishin qitur në vendngjarje. Aldo Hoxha nuk i është përgjigjur pozitivisht thirrjes për të ndaluar dhe rreth 300 metra më tutje ka flakur armën e zjarrit, duke tentuar te largohet. Gjatë hetimit të çështjes janë pyetur me cilësinë e deklaruesve shtetasit Erzen Avdiaj dhe Arber Meshi të cilët kanë deklaruar se janë grindur me të pandehurin Aldo Hoxha. Për këtë arsye Prokuroria e Rrethit Gjyqësor Tiranë e ka çuar për gjykim çështjen penale në ngarkim të të pandehurit Aldo Hoxha, nën akuzën e kryerjes së veprës penale të “Prodhimit dhe mbajtjes pa leje të armëve luftarake”, vepër që dënohet me gjobë ose me burgim gjer në shtatë vjet.  “I pandehur  Aldo Hoxha ka konsumuar veprën penale të “ Prishjes së qetësisë publike “ me veprime aktive të kundërligjshme në formën e gjuajtjes me armë zjarri në një ambient publik duke cenuar rendin, qetësinë publike, normalitetin e jetës në komunitet dhe duke vënë në rrezik sigurinë publike. Siç rezultoi nga shqyrtimi gjyqësor, i pandehuri Aldo Hoxha i ka kryer plotësisht me dashje veprat penale të mësipërme dhe duhet të deklarohet fajtor për këto vepra penale”-thuhet në vendimin e Gjykatës së Tiranës.  Por, fakti që i pandehuri ka treguar pendesë, ka bërë që gjykata e Tiranës të tregohet dorëlëshuar në dënimin e 20-vjeçarit, i kthyer në problem për zonë e Fushës së Avicionit në kryeqytet.

Vendimi

“Faktin se, i pandehuri e ka pranuar akuzën si gjatë hetimeve paraprake ashtu edhe gjatë gjykimit, duke u treguar shumë i penduar. Faktin se, i pandehuri është në kushte të rënda ekonomike dhe në moshë të re si i dhe mungesa e rrethanave rënduese bënë që Gjykata të çmojë se, i pandehuri paraqet rrezikshmëri shoqërore të tillë, e cila nuk e bën të nevojshme dhe të domosdoshme izolimin e tij nga shoqëria. Për rrjedhojë, mbështetur në nenet 47-50 të K.Penal Gjykata çmon se, i pandehuri Aldo Hoxha duhet të dënohet me 1 (një) vit e 6 (gjashte) muaj burgim, për kryerjen e veprës penale të “Prodhimit dhe mbajtjes pa leje të armëve luftarake”.  Gjykata çmon se, dënimi i mësipërm është është në përputhje me rrezikshmërinë e veprës penale, rrethanave të kryerjes dhe rrezikshmërinë e autorit të tyre, në rastin konkret”-vendosi më 19 dhjetor të vitit 2011 gjyqtarja Adriana Bera.

Dëshmia

Lumturi Gjana: Më duket se ky e vrau motrën time

Lumturi Gjana është rimarrë dje në pyetje mbi ngjarjen që tronditi tërë opinionin publik. Duket se për grupin hetimor ka qenë e domosdoshme dëshmia e gruas, pasi është e vetmja dëshmitare që ka parë vrasësin  e së motrës,  i cili në tentativë për t’i marrë varësen e floririt e ka qëlluar me thikë duke i shkaktuar vdekjen e menjëhershme. Megjithëse në një gjendje të rëndë psikologjike, Lumturi Gjana ka dëshmuar edhe një herë ngjarjen duke ngritur gishtin mbi Aldo Hoxhën. Lumturia, sëbashku me djalin  e saj 13-vjeçar kanë përshkruar trupin dhe veshjen e autorit të krimit duke thënë se ka dyshime të forta që djali që i shfaqej përtej xhamit, në një nga zyrat  e drejtorisë së Policisë së Tiranës, ishte autori i krimit. Megjithëse ajo nuk ka qenë fort e bindur për autorësinë e vrasësit, burime nga grupi hetimor bëjnë të ditur se janë të bindur në implikimin e Aldo Hoxhës në vrasje. Sipas të njëjtave burime, shkak për këto dyshime të motrës së viktimës ka qenë gjendja e saj e rëndë psikologjike. Lumturi Gjana ka mundur të rrëfej se djali që ajo ka parë të vrasë motrën  përngjante me Aldo Hoxhën, por se ajo nuk është fort e bindur. “Ky djali këtu më duket që pasi tentoi të merrte varësen e qëlloi edhe më thikë e më pas iku me motor”-mësohet të ketë dëshmuar Lumturi Gjana, gjatë seancës së  identifikimit të autorit të arrestuar si i dyshuari kryesor i vrasjes. Për dy orë, në ambientet e drejtorisë së Policisë së Tiranës, Lumturi Gjana  ka dëshmuar ngjarjen e 5 ditëve me parë. Fatbardha Tafa u vra me thikë pasditen e 7 gushtit, teksa po ecte bashkë me të motrën dhe fëmijët e tyre, në një rrugë dytësore, për të dalë shëtitje tek zona e Fushës së Aviacionit.

Ballkoni

Jetonte afër vendngjarjes

Menjëherë pas Ngjarjes Aldo Hoxha u  dyshua për vrasjen e Fatbardha Tafës dhe plagosjen e Lumturi Gjanës tek Fusha e Aviacionit. 20-vjeçari jetonte në afërsi të zonës së Doganës, në një shtëpi private, ku edhe u arrestua.

Autori i njihte gratë

Mësohet se banesa e tij kishte afërsi me banesën e motrës së viktimës, Lumturi Gjanës, edhe kjo e plagosur. Kjo afërsi ngre dyshime që autori i njihte gratë dhe mund t'i ketë ndjekur.

Njihej si konsumues i drogës

Mësohet gjithashtu se Hoxha është dënuar dhe një vit më parë për përdorim të armëve luftarake në zonën e Fushës së Aviacionit, si dhe ka qenë i skeduar më parë për vjedhje me dhunë. Ai njihet edhe si person që konsumon lëndë narkotike.

TIRANË -Policia ka arrestuar autorin e vrasjes së 38-vjeçares dhe plagosjes së motrës së saj në tentativën për t’i grabitur varësen e floririt dhe çantën pranë. 

I dyshuari është 20-vjeçari, Aldo Hoxha, i cili vrau me thikë Fatbardha Tafën teksa e sulmoi t’i grabiste varsen e floririt dhe çantën, e clia bëri rezistencë. 

Dy motrat, Fatbardha Tafa, 38 vjeçe dhe Lumturie Gjana kishin dalë për të bërë xhiron e mbrëmjes në shëtitoren pranë ish- fushës së Aviacionit kur janë bërë pre e grabitjes nga dy të rinj të cilët lëviznin me motoçikletë.

Policia tashmë është e sigurt Aldo Hoxha autori i vrasjes, i cili prej 72 orësh po mbahej nën vëzhgim nga policia. 

Burime nga policia bëjnë të ditur se për 72 orët e fundit, 20-vjeçari është marrë në pyetje intensive, por nuk i është përgjigjur asnjë pyetjeje. 

Policia ka dërguar për ekspertizë në laborator një kapele me gjak, e cila sipas burime iu gjet të dyshuarit në banesën e tij. Analizat rezultuan se ka një përputhje mes këtyre njollave dhe grupit të gjakut të viktimës apo motrës së saj që mbeti e plagosur, atëherë kjo është prova kyçe. 

Djaloshi nuk ka qenë i vetëm në kryerjen e krimit. Policia është vënë në kërkim të bashkëpunëtorit me të cilin u larguan nga vendi i ngjarjes menjëherë pasi qëlloi me thikë Fatbardhën. Në kërkim është dhe një person i dytë i cili mendohet se ka strehuar autorët në orët pas krimit.