8 gjërat që u sugjerohen të huajve që duan të vijnë në Shqipëri

Entela Resuli

Shqipëria për herë të parë këtë vit klasifikohet si destinacion i mirë turistik në suplementin e njohur - guidë të përvitshëm të “National Geographic”. Kur e vumë re këtë gjë në botimin e tyre online u gëzuam dhe kërkuam të dinim më tepër. Gjurmët na çuan tek Nevila Popa. Ajo është koordinatore e Programit për Turizmin në USAID dhe prej saj mësuam se vendet e listuara si atraksione turistike shqiptare janë renditur në një bashkëpunim mes ‘National Geographic” dhe USAID-it.  

“Janë përzgjedhur vendet më pikante të Shqipërisë, qytete dhe tradita e tyre. Për çdo turist që ka në program të vizitojë Shqipërinë kjo është një guidë e mirë, - thotë Nevila në bisedë me “Shekullin”, duke shtuar: “Ballkani Perëndimor është parë gjithmonë në optiken e konflikteve apo luftërave që kanë cenuar imazhin turistik të këtij rajoni. Pikërisht për të ndryshuar këtë perceptim, por edhe për të promovuar vërtetë vlera dhe karakteristikat e veçanta që kanë këto vende dhe veçanërisht Shqipëria, po shërben kjo nismë. E parë me “sytë” e “National Geographic” kjo merr tjetër vlerë, pasi është garancia që jep një markë e njohur për principe dhe standarde”.

Nevila ka shoqëruar nëpër Shqipëri edhe ekspertët e huaj që kanë dashur të vërtetojnë sugjerimet e saj dhe të punonjëseve që kanë punuar për të. 

“Ky portal i gjeoturizmit, - thotë Nevila, - promovon turizmin në një sere diapazonesh, si kultura, historia, arkitektura, folklori, gastronomia, tradita, autenticiteti, por edhe me njerëzit. E në njëfarë mënyre, kjo do te lidhet ngushtë edhe me atë rrugëtim që duhet të ndjekë zhvillimi i qëndrueshëm i turizmit në Shqipëri. Gjeoturizmi është ekzaktësisht ai që e jep këtë, që do të thotë se zhvillimi duhet të ndodhe duke ruajtur ato që janë vlera të trashëguara e të reja që mund të shiten. Në fund të fundit turizmi duhet të shesë, të gjenerojnë të ardhura”, - thotë specialistja e turizmit e USAID.

Amerikanët po mendojnë ndryshe

“Për amerikanët ka shumë destinacione turistike në botë. Por interesimi që ata kanë filluar të shfaqin për turizmin në Ballkan është një tregues se barrierat po thyhen dhe mentalitetet po ndryshojnë. Shqipëria dhe Kosova duket se do të presin shumë më tepër turistë në vitet që vijnë”- thotë Nevila Popa. Për këtë hartë udhërrëfyese u desh rreth një vit punë për të arritur fazën aktuale.

200 të ftuar panë fillimisht fotot

Portali që përmban informacionin turistik për Shqipërinë dhe vendet e Ballkanit u bë publik nga 18-22 qershor në selinë e “National Geographic” në Washington DC përmes një sërë ekspozitash me disa nga fotot më të bukura të vendeve të Ballkanit. Hapja e ceremonisë kishte rreth 200 të ftuar që përfaqësonin sektorët private dhe publike, komunitetin diplomatik dhe mediat.

Më në fund, Ballkani i bashkuar

Kjo guidë u krijua nëpërmjet një procesi bashkëpunues rajonal mes Shqipërisë, Bosnjë Hercegovinës, Kosovës, Maqedonisë, Malit të Zi dhe Serbisë. Vë në dukje pasuritë kulturore, historike dhe natyrore unike të Ballkanit Perëndimor. Është përpjekja e parë e përbashkët e vendeve të rajonit në lëmin turistik (www.balkansgeotourism.com).

Lista e sugjerimeve të National Geografich për të huajt në Shqipëri, në krye...rakia!

1 - Rakia

E ardhur në Shqipëri në shekullin e XIV gjatë pushtimit të Perandorisë Osmane, rakia është një pije alkoolike që është bë pjesë e kulturës tradicionale. Gjithkush në Shqipëri njeh të paktën një person që prodhon raki. Zakonisht për përftimin e rakisë përdoret rrushi, por shqiptarët thonë se edhe nga mareja del një raki e mirë. Pija në fjalë shihet nga shqiptarët edhe si një zgjidhje për të shëruar pothuajse çdo sëmundje. Ajo shoqërohet zakonisht me copa të vogla djathi.

2 - Kuzhina e pasur

Ndër vite, kuzhina shqiptare është ndikuar nga fqinji jugor, Greqia dhe ai perëndimor Italia. Një kuzhinë e pasur mund të gjendet në pothuajse të gjithë restorantet. Kryesisht ofrojnë një përzgjedhje të peshkut të freskët dhe mishit të shijshëm e të pjekur në zgarë, shoqëruar me perime të freskëta. 

Tavat e vogla të djathit dhe me vaj ulliri aromatik nga fermerët lokalë, kanë një shije të mrekullueshme kur shoqërohen me bukë të thekur.

3 - Të ngjisësh malin e Arapit

Ky është një mal sfidues. Vetëm njerëz me përvojë mund ta bëjnë këtë. Fshati i Thethit është pikënisja drejt Arapit. Mos harroni pajimet e nevojshme. Aty mund të mësosh shumë nga urtësia e banorëve. Është natyrë e bukur e ngjashme me Alpet e Zvicrës. 

4 - Trageti Koman-Fierzë

Liqeni i Komanit u krijua në vitin 1970 në kuadër të një projekti masiv hidroelektrik. Trupi gjarpërues është krijuar nga uji që rrethohet me shkëmbinj mijëravjeçarë. Udhëtimi ngjason si një shëtitje në fjordet e Norvegjisë. Zgjat dy orë dhe është diçka që nuk duhet humbur. Për të siguruar një vend në traget, ju duhet të mbërrini dy orë përpara nisjes në bord. Trageti ju jep mundësinë të shijoni një kafe gjatë udhëtimit.

5 - Apollonia e Butrinti

Shqipëria është e pasur me rrënoja të lashtësisë dhe vende historike, disa prej tyre pasuri e trashëgimisë botërore. Në zonën e Fierit, pranë fshatit Pojan ndodhet Parku Arkeologjik i Apollonisë që ka qenë pjesë e peizazhit mbi kodra që prej vitit 625 p.e.s. Në jug të Shqipërisë, Butrinti është një tjetër koleksion interesant rrënojash greke dhe romake. Mënyra më e mirë për të kuptuar vendin: Ndiqni rrugë kryesore dhe më pas drejtojuni amfiteatrit. 

6 – Begdeti vlonjat

E themeluar nga grekët e lashtë në shekullin e VI, p.e.s, Vlora është një nga qytetet më të vjetër shqiptare. Pas një shëtitje nëpër qytet, drejtojuni plazhit. Zona brenda e jashtë qytetit është mbi të gjitha një plazh. Vlora jep mundësinë edhe për një udhëtim të shpejtë në ‘thembrën’ e Italisë, pasi ndajnë së bashku detin Adriatik. Tragetet drejt Barit ankorohen në Vlorë.

7 - Kruja

Kështjella mbresëlënëse e cila është edhe Muzeu i Skënderbeut, është shtëpia e librave të vjetër, statujave, dokumenteve dhe pikturave madhështore. Pothuajse të gjitha këto i përkasin historisë së zonës dhe udhëheqësit më të madh të kohërave, Gjergj Kastriotit i cili kundërshtoi Perandorinë Osmane në shekullin XV. Nëse mundeni, vizitoni muzeun në perëndimin e diellit. Pamja nga tarraca e kështjellës shijon shumë. Pazari i vjetër i qytetit është krijuar në fund të shekullit XVII. Është restauruar në 1960 dhe është vendi më i madh i punimeve artizanale, duke përfshirë edhe qilimat prej leshi.

8 - Kalaja e Rozafatit

Pasi ndiqni një rrugë të pjerrët me kalldrëm do të gjendeni përballë një kështjelle me pozicion strategjik. Një pamje 360 gradë e qytetit të Shkodrës dhe lumenjve Buna dhe Drini. Ushtritë sulmuese nuk do të kishin asnjë mundësi për t’u fshehur në një terren të sheshtë që gjendet poshtë kalasë. Mendim i mirë strategjik nga ana e shqiptarëve. Mund të shihen fortifikimet e mbetura. Në ndërtim dhe rindërtim kanë dorë venedikasit dhe osmanët.