LUKSEMBURG - Luksemburgu është destinacioni i radhës i qytetarëve të Ballkanit që kërkojnë statusin e azilit. Alarmi është dhënë nga autoritetet e këtij vendi, të cilët kanë theksuar se po rritet numri i qytetarëve nga Serbia, Maqedonia, Shqipëria dhe vendet e tjera që kërkojnë statusin e azilit.

Ministria e Emigracionit në Luksemburg thekson se deri tani janë regjistruar rreth 1 500 azilkërkues. Afër 300 aplikime janë nga Serbia, 256 nga Shqipëria, 220 nga Mali i Zi, 156 nga Kosova, 142 nga Bosnjë-Hercegovina dhe 124 kërkesa për azil nga qytetarë të Maqedonisë.

Luksemburgu vitin e kaluar gjithashtu ka qenë i kërkuar nga azilkërkues ballkanikë, ku numri i të regjistruarve kishte arritur në mbi 2 100 veta.

Gjatë këtij viti, nga 1 500 kërkesa për azil, vetëm 28 prej tyre kanë marrë përgjigje pozitive të përkohshme, ndërsa pjesa tjetër është refuzuar.

Për të respektuar Traktatin e Dublinit janë realizuar 114 transferime të azilkërkuesve nga Luksemburgu në një vend të tretë të sigurt. Shumica e azilkërkuesve janë dërguar në Belgjikë, Gjermani, Greqi dhe Itali, raporton agjencia INA.

1 015 azilkërkues nga janari deri në korrik u kthyen andej nga kishin ardhur. Shumica e të kthyerve ishin nga Serbia (554), ish-Republika Jugosllave e Maqedonisë (228) dhe Shqipëria (114).

Kthimi i tyre është bërë mbi baza vullnetare. Vetëm 37 prej tyre janë kthyer mbrapsht nga Luksemburgu.