Partia Demokratike ka zbardhur tashmë numrin dhe emrat e partive që do të jenë në koalicion me të djathtën më 23 qershor. Kështu, sipas një burimi zyrtar në selinë e PD-së, në aleancë me PD-në do të jenë 21 parti politike, ku e vetmja parti e cila nuk ka vendosur akoma që të hyjë në koalicion, me kryeministrin Sali Berisha, është PDIUja. Edhe pse partia e çamëve është në dilemë për përcaktimin e koalicionit më me leverdi për ta, e vetmja alternativë që i ngelet tashmë është PD-ja. Pas deklaratave të kreut demokrat, Sali Berisha, në mbledhjen me krerët ‘blu’ të gjithë vendit se do të mente aleanca dhe me parti të majta, situata nuk ka ndryshuar dhe shumë në përbërjen e koalicionit të 2009-s. Tani për tani “Aleanca e Ndryshimit” ka bindur vetëm një parti e majtë, ADS-në e Gaqo Apostolit, e cila ka qenë në përbërje të koalicionit të djathtë. 

Koalicioni i ri 

Koalicioni i ri i cili do të quhet Koalicioni “Ne Jemi Ndryshimi”, i njëjtë si slogani i PD-së i shpallur ditë më parë nga kryeministri Berisha, do të përbëhet nga 20 parti + PDIU-në, që mbetet e papërcaktuar. Risitë e këtij koalicioni janë kthimi i PDK-së dhe ADK-së, dy parti demokristiane, e para kryesohet nga Nard Ndoka dhe e dyta nga ish pjesëtari i kësaj partie Zef Bushati. Edhe pse ish ambasadori Zef Bushati dhe ish kreu i PDK-së, gjatë një prononcimi për media deklaron se nuk do të jetë thjesht një parti që do të plotësojë koalicionin e majtë apo të djathtë, por një parti me vlera dhe personalitetin e vet, burime brenda selisë ‘blu’ bëjnë me dije se ADK-ja e z. Bushati do të jetë në koalicion parazgjedhor me PD-në dhe aleatët e vet. Një tjetër i rikthyer pas shumë vitesh është Dashamir Shehi, edhe pse në nivel lokal ka qenë disa herë me PD-në, kësaj radhe LZHK hyn në koalicion me PD-në, siç ka thënë dhe vet, gjatë një interviste dhënë për gazetën ‘Shekulli’ kohë më parë, i detyruar nga kodi zgjedhor. 

Besnikët 

Partitë besnike të PD-së dhe kreut të saj, Sali Berisha, si PR, Fatmir Mediu, PLL, Ekrem Spahia, AK, Neritan Ceka, LDK, Nikollë Lesi, PBDSH, Arjan Starova, PBK, Adriatik Alimadhi, PBKD, Artur Roshi dhe disa parti të tjera të vogla e përfaqësues të komuniteteve rome dhe minoritare do të vazhdojnë të jenë në koalicion parazgjedhor me demokratët. Në dilemë deri më tani është kreu i LDK-së Nikollë Lesi, i cili që me hyrjen e PDK-së në koalicion me Berishën ka shfaqur shenja xhelozie dhe tërheqjeje nga koalicioni, duke u parë shpesh herë me ish presidentin dhe Kreun e FRD-së, Bamir Topi. Gjithsesi nga selia e PD-së, bëjnë me dije se përkreu i liberal demokristianëve Lesi do të vijojë të mbështesë koalicionin me PD-në dhe do të jetë në fushatë krah për krah me Berishën. 

Takimi me aleatët 

Kryeministri dhe kreu i demokratëve, Sali Berisha, javën që vjen do të mbledhë tryezën e aleatëve të tij ku do të diskutojë mbi strategjinë dhe taktikën që do të zgjedhin për fushatën e koalicionit. Burime brenda PD-së, bëjnë me dije se ditën e mërkurë më 29 janar ose të enjte më 30 janar, në varësi të axhendës së kryeministrit Berisha, do të mblidhet tryeza e krerëve aktual të koalicionit të djathtë, ku sipas të njëjtave burime do të diskutohen çështje e fushatës, mënyra e kandidimit të partive në zgjedhje, zgjerimi i koalicionit si dhe pesha që do të mbajë secila parti politike në fushatë, edhe pse kjo fushatë tashmë ka filluar pothuajse për të gjitha partitë e mazhorancës. Propozimin e kreut të PD-së Berisha për zgjerim të koalicionit dhe me parti të majta, partitë e tjera si PR, PLL dhe PDK nuk e kanë kundërshtuar. Për Mediun, Ndokën dhe Spahiun mjafton që programet e tyre të përafrohen me programin e koalicionit pas zgjedhjeve me qëllim që të bashkëqeverisin 

Koalicioni i PD-së “Ne Jemi Ndryshimi” 1. PD, Partia Demokratike (Sali Berisha)

2. PR, Partia Republikane Shqiptare (Fatmir Mediu) 

3. PLL , Partia Lëvizja e Legalitetit (Ekrem Spahia) 

4. PDIU, Partia për Drejtësi dhe Integrim (Shpetim Idrizi) ? 

5. LZHK, Lëvizja për Zhvillim Kombëtar (Dashamir Shehi)

6. PDK, Partia Demokristiane e Shqipërisë (Nard Ndoka)

 7. LDK, Lidhja Demokristiane e Shqipërisë (Nikollë Lesi) ? 

8. ADK, Aleanca Demokristiane (Zef Bushati) 

9. PBDSH, Partia Bashkimi Demokrat Shqiptar (Arjan Starova) 

10. AD, Aleanca Demokratike (Neritan Ceka) 

11. PAA, Partia Agrare Ambientaliste e Shqipërisë (Lufter Xhuveli) 

12. PBK, Partia Balli Kombëtar (Adriatik Alimadhi) 

13. PBKD, Partia Balli Kombëtar Demokrat (Artur Roshi) 

14. POSH, Partia Ora e Shqipërisë (Zef Shtjefni) 

15. AMIE, Partia Aleanca e Maqedonasve për Integrim Europian 

16. PDRESH, Partia Demokracia e Re Europiane 

17. PDM e Re, Partia e të Drejtave të Mohuara e Re 

18. PFA, Partia Forca Albania 

19. ADS, Partia Aleanca për Demokraci dhe Solidaritet (Gaqo Apostoli) 

20. PRDSH, Partia e Reformave Demokratike Shqiptare 

21. PKONS, Partia Konservatore Shqiptare 

“Berisha të mbledhë sa më shpejtë partitë për koalicionin” 

Liberaldemokratët besojnë në një fitore të tretë të koalicionit të qendrës së djathtë, të drejtuar nga Partia Demokratike. Kryetari i Bashkimit Liberal Demokrat, Arjan Starova, deklaroi dje se, “përtej retorikave të fryra që shkëmbehen në tregun e politikës shqiptare të javëve të fundit, liberal demokratët besojmë fort në idenë se në Shqipëri ekzistojnë rrethana të tilla politike, ekonomike dhe shoqërore të cilat flasin qartë për mundësinë e një fitoreje të tretë të koalicionit të Qendrës së Djathtë. Mendimi politik opozitar, me gjithë përpjekjet e shumta, në një masë të madhe demagogjike, duke luajtur me të pavërtetat nuk mund ta fshehë faktin e madh të përparimit të vendit, dhe të qëndrueshmërisë së treguesve kryesorë të gjendjes ekonomike dhe shoqërore, madje në kushtet e një krize të mirënjohur financiare botërore, por që fatmirësisht kanë filluar të shfaqen shenjat e para të daljes prej saj. Bllokimi opozitar i statusit të vendit kandidat të Shqipërisë për në Bashkimin Evropian, nga ana e opozitës nuk e ndihmon as partinë Socialiste, as aleancën e sforcuar dhe të kopjuar, që vjen pas saj për t`i shpëtuar një humbjeje të tretë radhazi më 23 qershor. Ndoshta, ky bllokim statusit të vendit kandidat për në Bashkimin Evropian, e ndihmon këtë humbje të së majtës më 23 qershor si edhe ndërgjegjëson më tej bashkësinë ndërkombëtare për shkaktarët e vërtetë të këtij bllokimi”, tha kreu i PBLD-së. Ai e konsideroi të domosdoshme organizimin e një takimi të partive të koalicionit të Qendrës së Djathtë. Ky takim, sipas kreut të liberaldemokratëve, nuk kërkon të bëjë simetrinë e tryezës politike opozitare, sepse takime të tillë janë në traditën më të mire të së djathtës shqiptare. “Bashkimi Liberal Demokrat mbështet si gjithnjë politikën e koalicioneve fitimtarë sa më të gjerë në përputhje me idealet dhe vizionet e forcave politike të djathta pa paragjykime të çfarëdolloj dhe të frymëzuar nga nevojat e Shqipërisë”, tha Starova.  

“Legalistët në Kuvend dhe qeveri edhe pas 23 qershorit” 

Kryetari i Partisë Lëvizja e legalitetit, Ekrem Spahia, nëpërmjet një interviste për gazetën ‘Shekulli’ ka deklaruar se partia e tij do të hyjë në Kuvendin e Shqipërisë dhe do të jetë përsëri anëtare e qeverisë pas 23 qershorit. Sipas kreut të legalistëve, Spahia, koalicioni aktual do të shikojë mundësinë e futjes në gjirin e tij edhe parti të tjera që ndofta kanë orientim të majtë, por sipas tij duhet që programi i tyre të përshtatet me atë të maxhorancës aktuale. Zëvendësministri i Mbrojtjes, është shprehur se është pro zhvillimit të tryezave të partive në koalicion pasi një tryezë e tillë do të bëjë të mundur hartimin e strategjisë elektorale. Sa i përket kërkesave të PLL-së ndaj kreut të koalicionit në mazhorancë Berisha, Spahia deklaroi se nuk do të ketë kërkesa dhe pretendime pasi njihet tashmë kontributi i partisë së tij nga PD-ja. 

z. Spahia kush do të jenë partitë që do të përfaqësojnë koalicionin e mazhorancës së sotme në zgjedhjet e 23 qershorit? 

Koalicioni do të përbëhet nga parti të cilat kanë qenë tradicionalisht të lidhura me Partinë Demokratike, ku ndër to është dhe Partia Lëvizja e Legalitetit, parti e cila ka qenë shumë korrekte gjithë këto kohë me PD-në. Pas zgjedhjeve parlamentare të 2009- s në këtë koalicion janë afruar dhe disa parti të tjera, përfshi këtu dhe LSI-në, sepse elektorati shqiptar e përcaktoi me votën e vet që të dy koalicionet të ishin barazim, pra me numër të barabartë deputetësh 70 me 70. Partia Lëvizja e Legalitetit dhe disa parti të tjera, që kanë qenë në mënyrë të vazhdueshme edhe në kohën kur PD-ja ishte në opozitë, por edhe tani në bashkëqeverisje, besoj se do të jemi të gjithë edhe në këto zgjedhje në koalicion me PD-në. Kryeministri Berisha ka deklaruar ditë më parë se do afrojmë në koalicion dhe parti të majta, ju si e komentoni? Për zgjedhjet e ardhshme të 23 qershorit unë mendoj se do të përfshihen në koalicion të gjitha partitë aktuale të koalicionit qeverisës, duke e lënë të hapur mundësinë për tu afruar parti të cilat do ti përshtaten programit të koalicionit tonë për vitet e ardhshme 2013-17, sigurisht do të shikohet seriozisht pjesëmarrja e këtyre partive në koalicion. 

Cili ka qenë kontributi juaj në këtë koalicion gjatë këtyre 8 viteve bashkëqeverisje? 

PLL-ja ka dhënë kontributin e saj gjatë këtyre viteve në mazhorancë, sikurse edhe jep kontributin në të gjitha njësitë vendore që kontrollohen dhe drejtohen nga legalistët. Ne kemi përkreu faqësimin tonë në të gjitha këshillat e bashkive dhe komunave të vendit, drejtojmë këshilla komunal apo bashkiak, dhe japim kontributin tonë, tashmë të vlerësuar dhe nga aleatët tanë. 

Javën që vjen flitet se do të zhvillohet një takim i Kryeministrit dhe Kreut të PD-së, Sali Berisha, me partitë aleate dhe ku do të përcaktohet dhe koalicioni i ardhëm. Çfarë do t’i kërkoni Kryeministrit ju si PLL, cilat do të jenë kushtet e përfaqësimit në koalicion? 

Ne kemi insistuar që të kemi një sistem zgjedhor ndryshe nga ky aktuali, një sistem zgjedhor, proporcional kombëtar, dhe të bëheshin përmirësime dhe kodit zgjedhor. Por, tashmë jemi përballë një fakti të kryer ku kemi një sistem, proporcional rajonal, me këtë kod ne gjithë praktikat elektorale do ti ndërtojmë mbi bazën e këtij kodi. Duke parë se ku sistem elektoral nuk favorizon partitë që dalin më vete por koalicionet, duke pasur parasysh këtu dhe baraspeshën që treguan zgjedhjet parlamentare të 2009-s dhe ato lokale të 2013- s, çdo subjekt politik, parti politike, pothuajse është i imponuar që të rreshtohet në koalicion. Të gjitha partitë në koalicion kanë peshën e vet. Marrëveshja jonë me PDnë nuk është e kushtëzuar, pasi prej vitesh kemi patë një marrëdhënie korrekte mes nesh dhe kemi qenë të sinqertë në kontributet tona në koalicion. Sa i përket takimit, ne jemi të mbledhur pothuajse në çdo kohë pasi jemi pjesë e qeverisë. Por çdo takim që zhvillohet për të hartuar taktikat elektorale për zgjedhjet e ardhshme do të jetë në dobi të fitores së zgjedhjeve të 23 qershorit. 

Në cilën zonë do të përqendrohet PLL-ja për të maksimizuar votat? Po ju vet z. Spahia a do të kandidoni?

Viti 2012-t ka qenë një vit suksesi për PLL-në, ku kulmin arriti vlerësimi i figurës së mbretit Ahmet Zogu, vlerësimit të kontributit të familjes mbretërore, si dhe gjithë eksponentëve nacionalist të legalitetit. Ne si PLL, në zgjedhjet e kaluara lokale kemi marrë një rezultat rreth 50 mijë vota në gjithë vendin, të konvertuara në kryetarë komunash, këshillash dhe këshilltarë. Në zgjedhjet e ardhshme të 23 qershorit Partia e Legalitetit synon që të jetë një faktor real në Parlament por dhe në qeveri. PLL-ja do të konkurrojë me listat e veta në 12 qarqe të vendit, këto lista do t`i kryesojnë eksponentët e partisë por dhe personalitetet më të mirë që janë të gatshëm të përballen me elektoratin. Jemi në fazën e evidentimit të kandidatëve të mundshëm që do të përfaqësojnë PLL-në në zgjedhjet e 23 qershorit.  

/Shekulli Online/Plarent Shehu/