TIRANË - Mes debateve të shumta dhe kundërshtimeve të opozitës, Këshilli bashkiak i Tiranës ka kaluar vetëm me votat e mazhorancës Planin e Përgjithshëm Rregullues për Tiranën, përkatësisht me 28 vota pro, 11 kundër dhe 1 abstenim. Mbledhja e këshillit, e fundit për 2012, u shoqërua me debate mes palëve si për planin urbanistik, ashtu edhe për buxhetin afatmesëm të Bashkisë për vitet 2013-2015, të miratuar më herët po me votat e mazhorancës.

“Projekti për zhvillimin e qytetit është hartuar nga ekspertët më të mirë vendas dhe të huaj, ka marrë miratimin e qytetarëve të Tiranës dhe grupeve të interesit. Në themel të këtij plani vihet për herë të parë interesi i qytetarëve të Tiranës, autoktonë apo të ardhur qofshin. Ky plan përcakton në vija të përgjithshme drejtimet e zhvillimit të qytetit, që nga nëntoka, tek infrastruktura, harta e përdorimit të tokës, tek shpërndarja e komponentëve të ndryshëm të një qyteti, ekonomik, social, kulturor, biznesi, banimi, rekreacioni, gjelbërimi etj. Asnjë leje zhvillimi nuk mund të jepet thjesht me planin e përgjithshëm. Plani i përgjithshëm normon. Për ta bërë pak më të prekshme, plani është “Kushtetuta”, u shpreh kryetari i Bashkisë së Tiranës, Lulëzim Basha.

Sipërfaqe e gjelbër, 0.8 m2 për banor

Sa i përket sipërfaqeve të  gjelbra, Basha ka raprotuar se jemi në kuotat 0.8 m2 për banor, rezultat i drejtpërdrejtë, nga njëra anë e presionit që ka ardhur si pasojë e shtimit të popullsisë dhe nga ana tjetër e zhvillimit pa plan të qytetit, i cilit kryesisht ka sakrifikuar, apo “viktimizuar“ hapësirat e gjelbra. Synimi  i planit është të kalojë në normën prej 3 m2 për person, që është afërsisht 3.4 % por jo më pak. 

Brenda janar-shkurtit Bulevardi i Ri i Tiranës

Sipas Bashës, brenda muajve janar - shkurt do të fillojë puna parapërgatitore për ndërtimin e bulevardit të ri të Tiranës, me zhvendosjen e linjës së tensionit të lartë që kalon një pjesë edhe te Bulevardi “Zogu i Parë”, si dhe zhvendosja e hekurudhës dhe stacionit aktual të trenit.  Pra, është një arterie e gjelbër, me një park të ri dhe nëse mund ta imagjinojmë pak Tiranën të vendosur përmes dy parqeve, dy lumenjve,  pjesa e bulevardit që nis nga stacioni i trenit deri te bulevardi i Paskuqanit do të jetë edhe pjesa më e gjelbër e qytetit.

Kredi për familjet pa strehë

Këshilli Bashkiak miratoi 342 familjet që përfitojnë nga projekti për subvencionimin e interesave të kredisë dhe 30 familje në nevojë që do të trajtohen me bonus strehimi, të cilat nuk mund të përballojnë qiranë e tregut të lirë. Në këtë mbledhje u miratua krijimi i Qendrës Komunitare Shkozë  si dhe ndryshimi i strukturës organizative, me qëllim për t‘u ardhur sa më shumë në ndihmë personave në nevojë të qendrave sociale: “Të qëndrojmë së bashku” dhe  “Shtëpia e Përbashkët”.

Linjë private urbani Kombinat-Kinostudio

Me qëllim përmirësimin e shërbimit ndaj qytetarëve, në një nga linjat me problematike, Kombinat-Kinostudio, Këshilli Bashkiak ka miratuar propozimin e Kryetarit të Bashkisë Lulzim Basha, për nisjen e  procedurave, për dhënien ne administrim të një operatori privat, të kësaj linje e cila është e  vetmja  linjë publike në Bashkinë e Tiranës.

/Shekulli Online/M.A./