Kryeministri i Shqipërisë, Sali Berisha, është shprehur se lideri i opozitës bëri të mundur bllokimin e marrjes së statusit të vendit kandidat për anëtarësimin në BE. Por, Berisha nga ana tjetër është shprehur i bindur se “ky mur bllokimi”, do të shembet në zgjedhjet e ardhshme.

“Komisioni Evropian ka bërë një raport pozitiv, por ka përcaktuar votimin e tri ligjeve si një detyrim në mënyrë që ti bëjë rekomandimin përfundimtar Këshillit të Ministrave të Bashkimit Evropian. Këto tre ligje janë mbajtur dhe mbahen peng nga kryetari i opozitës, i cili beson se duke bllokuar statusin për shqiptarët dëmton qeverinë dhe bën një kalkulim shumë shumë të gabuar. E vërteta është se shqiptarët kanë të gjithë fuqinë, potencialin për të shembur çdo mur. Siç rrëzuan murin e bashkisë, siç rrëzuan ‘murin e berlinit’ dhe e festuan, tani do të rrëzojnë edhe murin bllokimit të zotit Rama”, tha Berisha.

Për këtë gjithashtu Berisha tha se, “mora sigurinë që Partia Popullore Evropiane do të shqyrtojë në mënyrë të veçantë këtë situatë të krijuar nga ky bllokim absurd i një njeriu që e bën atë për interesa të karriges së tij të pushtetit”.

Nga Brukseli ai ka deklaruar se në takimin me liderët e PPE-së ka folur edhe për “albanofobinë”. Nga ana tjetër ka nënvizuar se i mbetet idesë për bashkimin e shqiptarëve në një proces të njëkohshme me integrimin në BE.

“Në takimet që pata me kolegët e mi i njoha ata me të gjitha zhvillimet, me situatën në rajon, e cila me gjithë përparimin e njohur sërish vuan nga albanofobia, një faktor ky i dëmshëm për bashkëpunimin dhe klimën bashkëpunuese në rajon. Albanofobia është një qëndrim që i ka rrënjët në padrejtësitë më të mëdha të bëra ndaj shqiptarëve dhe më pas përpjekja për ti legjitimuar këto padrejtësi në forma nga më të ndryshmet”, ka thënë Berisha.

/Shekulli Online/Përgatiti: F.S./