E hapur për çdo aleat politik, por me theksimin se PS-PD përfaqësojnë një politikë të vjetër dhe përgjegjëse për tranzicionin. Ish-Presidenti i Republikës, Bamir Topi, shprehet në intervistën për gazetën “Shekulli” rreth sfidave të reja politike që qëndrojnë përpara, tashmë në rolin e drejtuesit të një force të re politike: Fryma e Re Demokratike. Rivaliteti me PD-në është i qartë dhe madje, sipas Topit, lufta politike mes dy forcave verbalisht po zhvillohet në qendër, pasi “demokratët e vërtetë e dinë që FRD-ja është familja e tyre politike”. Për më tepër që FRD-ja vjen me pretendimin se qenia e saj do të imponojë reformimin e PD-së, apo ikjen e Sali Berishës. 

Z. Topi keni vetëm pak muaj që jeni shkëputur nga detyra e Presidentit të Republikës për t’iu kthyer politikës aktive me partinë tuaj të re. Si do ta përkufizonit situatën politike dhe institucionale në vend tashmë që jeni më afër me njerëzit? 

Nuk ka ndonjë diferencë të madhe midis gjykimit tim për realitetin gjatë funksionit presidencial dhe aktivitetit të sotëm politik. Unë kam qenë përherë në kontakte me njerëzit dhe vetëm gjatë vitit të fundit kam zhvilluar vizita në gjysmën e rretheve të vendit. Në atë periudhë artikulimi zyrtar dhe synimi të mos përfshija në debate paragjykuese institucionin e kreut të shtetit dominoi ndjesitë personale, kurse sot, janë këto të dytat që më lejojnë të flas më direkt mbi gjithë problemet për të cilat gjatë pesë viteve kam folur në komunikim zyrtar me institucionet. Është e dukshme se ka një bllokim të jetës institucionale e politike, ka shumë politikë, por nuk ka produkt, nuk ka qeverisje efektive dhe as projekte zhvillimi, ka ulje të peshës së institucioneve kushtetuese dhe dominim të një retorike të njohur konfliktuale, pa asnjë dobi për vendin dhe qytetarët. Gjithashtu është e dukshme se ka rënë aureola e shtetit funksional, dhe se një individ e besnikët pranë tij kanë marrë të gjitha pushtetet nën kontroll, duke shkelmuar parimin kushtetues të ndarjes dhe balancës së pushteteve dhe arritjet shumëvjeçare në formësimin e institucioneve të pavarura. Ka një hendek midis pushtetit dhe qytetarëve, parlamenti është jashtë funksionit normal demokratik, ekzekutiv dominon çdo pushtet, korrupsio- ni është në nivele alarmante dhe ka vendimmarrje amatoreske pothuajse në të gjitha nivelet 

Shkrimin e plotë e gjeni sot në gazetën Shekulli

Skerdilajd Zaimi