A u përsërit pakti PS-PD? Meta: Në 2008-n u përjetua si tragjedi, sot si komedi

Publikuar më 19. 05. 2017 nga Eno Shkëmbi

Ish-kreu i LSI-së Ilir Meta ka folur sërish për marrëveshjen Rama-Meta gjatë intervistës së dhënë mbrëmjen e sotme në emisionin “Zonë e Lirë” në Tv Klan.

I pyetur nga moderator Arjan Çani nëse është përsëritur sërish pakti i vitit 2008-s PS-PD për të eliminuar LSI-në dhe partitë e vogla, Meta tha se historia nuk përsëritet dy herë njësoj.

“Është e rëndësishme që z. Rama dhe Z. Basha i dhanë fund një kalvari vuajtjesh të qytetarëve shqiptarë dhe i dhanë mundësinë vendin të jetë më i qetë”, tha Meta.

Më tej ish-kreu i LSI-së shtoi se arsyet e krizës ishin artificiale pasi zgjidhja mund të ishte bërë më herët, kur në Tiranë erdhi përfaqësuesi i PPE-së, McAllister.

I pyetur nëse LSI-ja në këto momente është e paralizuar, Meta u përgjigj se: “Së pari duhet të kemi parasysh që historia nuk përsëritet dy herë njësoj. Nëse në 2008-n u përjetua si tragjedi sot e përjetojnë si komedi. LSI nuk dëmtohet nga asnjë lloj manovre, sepse të gjitha forcat politike do të garojnë në mënyrë të barabartë, dhe LSI ndihet e sigurt për të dalë forcë e parë, ndoshta do të dëmtohen disa parti të reja, po kjo nuk është përgjegjësi e LSI-së”. /E.SH/