UEFA, “shuplakë” Manchester City-t, përjashtohet për dy sezone nga Champions League

UEFA ka marrë një vendim të rëndë për kampionët e Premier League, Manchester City-n, duke tronditur tifozët e “qytetarëve”.

Kështu, City është përjashtuar nga Champions League dhe çdo kompeticion europian për dy sezone, atë 2020-2021 dhe 2021-2022.

UEFA e ka ndëshkuar klubin me një gjobë që kap vlerën 30 milionë euro për thyerje të rregullave të Fair Play-t Financiar.

Në reagimin e parë mbi vendimin drejtuesit e City shprehen “të zhgënjyer por jo të suprizuar” nga vendimi të cilin e konsiderojnë si “paragjykues”.

Në vendimin e UEFA thuhet: “Dhoma e Hetimit, duke marrë parasysh të gjitha provat, kuptoi se Manchester City kishte bërë shkelje serioze të rregulloreve duke fryrë të ardhurat nga sponsorizimet në llogaritë e saj në informacionin që i dha UEFA-s për periudhën 2012-2016. Dhoma e Hetimit ka imponuar masa disiplinore ndaj Manchester City-t duke udhëzuar që të përjashtohet nga pjesëmarrja në aktivitetet për klube të UEFA-s në dy sezonet e radhës (2020/21 dhe 2021/22) si dhe të paguajë një gjobë prej 30 milionë eurosh”.

Kujtojmë që UEFA nisi hetimin pasi një haker siguroi dokumente të cilat u publikuan në mediat gjermane, ku tregohej se si ishin fryrë shifrat në sponsorizimet e klubit, falë kompanive që ishin të lidhura në mënyrë direkte me grupin në Abu Dabi që zotëron Manchester City, për të anashkaluar Fair Play Financiar.

E vetmja shpresë për City-n dhe tifozët tanimë mbetet apelimi në Gjykatën e Arbitrazhit Sportiv (CAS) që ndodhet në Zvicër. Nëse vendimi mbetet në fuqi atëherë me gjasë klubi i madh do të pësojë largime, duke nisur nga trajneri Pep Guardiola për të vijuar me “yjet” e shumtë që skuadra zotëron.

 

 

 

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/



Leave a Reply

Your email address will not be published. Required fields are marked *

Të tjera

Abissnet