Studentët priten sërish në besë, kthehet tarifa e provimeve të mbartura (Dokumenti)

Ndryshimi i VKM-së përplas studentët, një pjesë e tyre paguajnë tarifë të plotë. Ata shprehen për “Shekulli”-n se janë gjendur të papërgatitur dhe nuk dinë si të veprojnë

Enida Vërça

Një vendim i ri , i detyron studentët të paguajnë tarifën e plotë të studimit. Të rinjtë janë gjendur të befasuar nga ky lajm, të cilin e kanë mësuar pak ditë më parë. “Shekulli”, ishte i pranishëm në disa fakultet, ku pyeti nga afër studentët, e po ashtu sekretaritë përkatëse, të cilat deklaruan se studentët që kanë një provim të mbartur nuk përjashtohen nga tarifa pavarësisht mesatares. “Janë afishuar në faqen zyrtare të fakultetit të Historisë dhe Filologjisë kategoritë që paguajnë dhe ato që përjashtohen. Për studentët që kanë një provim të mbartur nga vitet e shkuara, pavarësisht arsyes, përmirësimi, apo për çfarëdo motivi, studentët do të paguajnë tarifë të plotë. Të përjashtuar nga tarifa janë ata studentë të cilët nuk kanë provime të mbartura e po ashtu ata që kanë mesatare mbi gjashtë”, tha sekretaria mësimore për “Shekulli”-n.

Studentët

Arbjona Çibuku studente e gazetarisë thotë se tarifa e plotë është 300 mijë lekë dhe afati i pagesës është deri në 15 shkurt. “Nëse nuk paguajmë, nuk hyjmë dot në provime. Kjo është sërish një tallje me studentët, pasi të gjithë ne kemi ndonjë provim të mbartur. Unë mesataren e kam mbi 8, por fakti që kam një provim më detyron të paguaj”, thotë ajo. Më tej Çibuku sqaron edhe si janë njoftuar për këtë çështje. “Fillimisht kemi parë një njoftim që ka qarkulluar nëpër rrjetet sociale. Për t’u informuar më shumë pyetëm si në zyrën e informacionit ashtu edhe në sekretari dhe na konfirmuan se nëse kemi qoftë edhe një provim të mbartur duhet të paguajmë. E gjithë kjo bie në kundërshtim me atë që ne kemi kërkuar vitin e kaluar nga qeveria dhe me atë që po qeveria parashtroi te “Pakti për Universitetin”. Supozohej që të gjithë studentët do të përfitonin një përgjysmim të tarifës për ata që kishin mesatare nga 6 deri në 8 dhe ata që e kishin mesataren nga 9 deri në 10 do të përjashtoheshin. Kjo gjë nuk ndodhi, pasi tani kanë ndryshuar rregullat m,e provimet e mbartura”, përfundoi ajo.

   Arbjona Çibuku, studente

Universiteti Bujqësor

Situata paraqitet e tillë edhe në Universitetin Bujqësor të Tiranës. Studentët janë njoftuar në e-mailet e tyre personale, se nëse kanë një provim të mbartur do të paguajnë tarifën e plotë. Halit Roçi student në këtë universitet thotë për “Shekulli”-n se pasi kanë marrë këtë lajm, kanë çuar një kërkesë për informacion. “Kërkesa jonë është dërguar në ministri për të na sqaruar këtë VKM. Aty thuhet që studentët që janë me mesatare nga 9 deri në 10, duhet të mos kenë asnjë provim të mbartur. Ndërsa studentët me mesatare mbi 6 që përfitojnë përgjysmimin, nuk është cilësuar nëse duhet të kenë provime të mbartura apo jo. Administrata e çdo universiteti ka marr një vendim që të pres një përgjigje zyrtare nga ministria, nëse duhet ta marr të mirëqenë nëse do të trajtohen njësoj si ekselentët ashtu edhe pjesa tjetër”, thotë ai. Sakaq, ne kontaktuam edhe administratorin e këtij universiteti i cili deklaroi se në këtë universitet është shtyrë afati i pagesës deri më 31 mars, në mënyrë që të merret një vendim zyrtare.

                Halit Roçi, student

Përplasja e VKM-ve

Në vendimin e ri thuhet, “studentët e ciklit të parë (Bachelor) të cilët kanë mesataren mbi 6 dhe kanë shlyer të gjitha detyrimet e  vitit paraardhës (Viti i II dhe i III-të), do të paguajnë 50% të tarifës, pra 15.000 lekë. Për studentët e vitit të I do të merret parasysh lista e dërguar në Qendrën e Shërbimeve Arsimore. Studentët që kanë mesataren nën 6, do të paguajnë tarifë të plotë, 30.000 lekë. Të gjithë studentët që rezultojnë me 1 ose më shumë lëndë jo kaluese në vitin paraardhës do të paguajnë 100% të tarifës së shkollimit të këtij viti akademik, gjithashtu edhe studentët që kanë mesatare nën 6.00 do të paguajnë 100% të tarifës së studimit ”, thuhet në këtë vendim. Ndërkohë në një vendim më të hershëm, përveç kategorive që përfitojnë nga përgjysmimi i tarifave saktësohej se studentët e programeve të studimit të Ciklit të Parë dhe Ciklit të Dytë të cilësuar si përsëritës sipas rregullores së Universiteti të Tiranës, nuk do të paguajnë tarifë shkollimi.

 

 

    E-maili që u është dërguar studentëve

                                                                                       Vendimi i vjetër

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/



Leave a Reply

Your email address will not be published. Required fields are marked *

Të tjera

Abissnet