Shpërthimi i 4 makinave, banorët e pallatit: Ishte më keq se tërmeti

Foto 1 nga 1 Pas Para

Diamila Leka

Pak pas mesnate, parkingu i një pallati në zonën e Yzberishtit është përfshirë nga flakët ku janë shkrumbuar 3 makina ndërsa 1 tjetër është djegur plotësisht. Pas tërmetit të 26 nëntorit, situata në vend ende nuk është stabilizuar dhe kjo ngjarja shtoi më tepër panikun te banorët e këtij pallati për një tjetër tërmet të mundshëm. Sakaq, ata shprehen për gazetën “Shekulli” se janë tmerruar kur dëgjonin banorët e tjerë të pallatit që ulërinin dhe se ishin alarmuar. Ndonëse banorët folën dhe dhanë një prononcim për gazetën “Shekulli”, ata ndihen të frikësuar dhe të pashpresë sepse, sipas tyre, ky problem nuk do zgjidhet. Dëmet që ka shkaktuar shpërthimi i makinave në katin e nëndheshëm sipas banorëve janë të mëdha dhe se ky rast ishte më i frikshëm se tërmeti. Zjarrvënia dyshohet të jetë e qëllimshme, megjithëse banorët nuk kishin informacion mbi këtë gjë. Dyshohet se flakët e zjarrit ka depërtuar në katet e mësipërm përmes tubave të ajrimit duke shkaktuar panik te banorët, por jo vetëm.

(Në video, 3 makinat e shkrumbuara në garazh, makina tjetër u nxorr jashtë garazhit pasi ishte djegur pjesërisht)
Ngjarja

Ngjarja ndodhi rreth orës 1 të mëngjesit të kësaj të marte në rrugën Azem Meshi. Zjarrvënia e makinave të parkuara në garazhin e pallatit shkaktoi një tjetër panik te banorët. Përpos dëmeve materiale, tre nga banorët e këtij pallati janë dërguar në urgjencë pasi nga tymi i shkaktuar nga djegia, janë asfiksuar dhe u janë shfaqur probleme shëndetësore.

“Në orën 1 të natës u zgjuam të tromaksur nga zërat e komshinjve. Dëgjonim që bërtisnin fëmijët ‘ndihmë, ndihmë’. Ishim të përgjumur dhe kujtuam se mos kishte rënë ndonjë tërmet dhe mos kishte zënë poshtë këta banorët e shtëpive private. Pastaj hapa derën e shtëpisë, por çfarë të shihja. Tym, erë e djegur, u bllokuam. Mora fëmijët, zbritëm poshtë. Dilte tymi shtëllunga-shtëllunga. Zjarrfikësja erdhi shumë vonë sepse kishte vështirësi të gjente vendin. Erdhi zjarrfikësja, erdhi ambulanca që mori tre komshinjtë tanë se u asfiksuan”, shprehet për gazetën “Shekulli”, Zhaneta Metani, banore në pallat. Ndërkohë, të gjithë sistemet hidraulike dhe elektrike të pallatit kanë dalë jashtë funksionit.

Flakët e zjarrit u izoluan brenda garazhit ndërsa tymi ka depërtuar deri në katin e fundit të pallatit. Në apartamente nuk ka pasur dëme materiale përpos tymit dhe disa prej banorëve kanë pasur probleme shëndetësore pasi janë asfiksuar. Administratori i pallatit shprehet se kati i fundit ka pasur më tepër probleme pasi tymi grumbullohej lartë dhe nuk kishte nga të dilte se dera e tarracës ishte e mbyllur.

Gazeta “Shekulli”, shkoi në vendngjarje dhe brenda në një prej banesave të këtij pallati shiheshe shenjat e zeza të tymit. Familja Qosja tregon tmerrin e përjetuar në këtë situatë të pa stabilizuar ende mirë pas tërmetit dhe tragjedisë që la pas. “Në orën 12:23 ka rënë një tërmet dhe diku pas 10 minutave u dëgjua një zhurmë, dëgjova dhe të dytën ndërsa dola në ballkon se kisha lënë makinën pranë kabinës elektrike dhe mendova se mos kishte shpërthyer ajo. Në shtëpi kisha vëllain, nusen e vëllait dhe vajzën e vogël të tyre dhe u përpoqëm që të rrinim pak në ballkon sa të mund të dilnim jashtë. Kati sipër nesh, kati i gjashtë ka qenë më keq sepse shkonte i gjithë tymi lartë.”, shprehet kryefamiljari i familjes Qosja.


(Në video, banesa e familjes Qosja)

Ndërkohë Dritan Bajrami, një tjetër banor i këtij pallati shprehet për gazetën “Shekulli” se kishte qëndruar gati një orë e gjysmë në ballkon deri sa të pastrohej ajri disi nëpër shkallët e pallatit. “U zgjova nga gjumi i tmerruar. Dëgjova një që bërtiste. Pash që kishte marrë fëmijën me vete dhe ikte. Dola në ballkon, pash tymin që dilte i gjithë këtej nëpër dritare. Tentova të nxirrja fëmijët jashtë bashkë me nënën por ishte e pamundur. Pastaj kam ndenjur gati një orë e gjysmë në ballkon. Poshtë ishte zjarrfikësja, ishte policia dhe asgjë. I kërkova një litar për të zbritur me litar, që të zbrisja fëmijët, por nuk ma dhanë. Asgjë. Prita sa iku tymi, që u pastrua dhe zbritëm nga shkallët. Ky ishte një tmerr më i keq se tërmeti. Ra tërmeti dhe u futëm prapë në shtëpi. Po këtu ku të futesh, dy minuta të rrish të zë koka, ne asfiksohemi.”, u shpreh Dritan Bajrami.

(Një prej hyrjeve të pallatit ku u përfshinë nga flakët makinat)

Leave a Reply

Your email address will not be published. Required fields are marked *

Të tjera

Abissnet