SHBA, rrëzohet helikopteri mbi Kanionin e Madh, vdesin 3 persona

Publikuar më 11. 02. 2018 nga Xhentila Gjoshi

Një helikopter turistik është përplasur në Kanionin e Madh të shtetit amerikan të Arizonës, duke shkaktuar vdekjen e 3 personave e plagosur të paktën 4 të tjerë.
“Mjeti transportues ajror ka pësuar dëmtime të mëdha”, tha një zëdhënës i Autoritetit Federal të Aviacionit.
Helikopteri ishte duke fluturuar mbi zonën perëndimore të Kanionit të Madh, kur u rrëzua rreth orës 17:20 me atë lokale të së shtunës (1:20 pas mesnate, e diel).
Ende nuk dihen shkaqet që çuan në rrëzimin e tij, apo cila kompani ishte duke operuar me të. Mediat lokale thonë se helikopteri ishte i tipit “Airbus Eurocopter EC130”.
Kanioni i Madh, me një thellësi prej mbi 1.6 km, është një nga atraksionet turistike më të vizituara në Shtetet e Bashkuara.