Mesazh i fortë i Ndrenikës: Po bëjnë kulla në vend të teatrit, aktorët paguhen për një kafshatë (VIDEO)

Të organizuar në Sindikatën e Artistëve të Skenës dhe Ekranit, në një mbledhje të hapur për mediat, artistët kundërshtuan zhvendosjen sipas tyre jo transparente të trupës së Teatrit Kombëtar te Teatri “Turbina” dhe njëkohësisht amendimet në ligj që ata mendojnë se “cenojnë rëndë” statusin e artistit.

Një reagim i fortë erdhi nga artisti i mirënjohur Robert Ndrenika, i cili kundërshtoi fuqishëm projektligjin e paraqitur nga Ministrja e Kulturës, Mirela Kumbaro, për disa ndryshime në ligjin aktual për Artin dhe Kulturën.

Duke iu bashkuar protestës së artistëve, Ndrenika thekson se Tirana meriton të ketë një teatër serioz, sikundër ka çdo kryeqytet i vendeve të Ballkanit.

“Plot shumë vite më parë edhe PPSH thoshte do bëjmë një teatër, por ky teatër nuk u bë. Edhe këto 27 vjet është folur se do të bëhet një teatër, por nuk ka patur pikë transparencë. Tani kërkohet që këta privat të bëjnë kulla dhe në këto kulla aneks të jetë teatri. Pra vazhdon një vjedhje, sheshit… e hapur. E kam thënë edhe e them që të gjithë kryeqytetet e Ballkanit kanë Teatro Kombëtare dhe teatri bëhet njëherë në 500 vjet. Sot mund të ketë nga ata që thonë: e mo, ç’janë këto, këta s’dimë të aktrojmë, por nuk mendohet se Shqipëria do mbetet pa aktorë. Këtu po bëhen kisha dhe xhamia dhe nuk bëhet një Teatër. I thashë dikujt shiko çfarë xhamie është bërë, dhe më tha se atë po e bën Erdogani. Shumë mirë, sepse teatri duhet ta bëjë shteti shqiptar, sepse teatri është kisha dhe xhamia e shqiptarëve”, u shpreh Ndrenika.

“Vajtëm dhe pamë atë godinën te Turbina. Ajo godinë është vetëm për fushatë elektorale, por jo për teatër. Ajo fjala që i kam thënë ministreshës se unë do shtrihem te turbina dhe ajo që e ktheu me ironi po le të vijë të aktrojë në skenë, duket se ka qenë një fjalë me mend. Ne nuk do të lejojmë që të prishet teatri, ndërsa për TOB-in të mos guxohet t’i qaset. Dhe një gjë, mos kini shumë shpresë te këto analistët e mëdhenj që dalin në televizione, sepse para 20 vitesh ato u bënë me atë ministren e asaj kohe. Kur i kërkova ministreshës të na jepte ca para për lapidarin e Spahivoglit, nuk më dha as 5 lekë për këtë lapidar. Kam edhe të tjera për të thënë, por tani nuk më kujtohen, pasi më vijnë kur jam në krevat, në ëndërr. Edhe një gjë! Kemi aktorë të mrekullueshëm dhe paguhen për një kafshatë bukë. Kur të vënë litarin e bukës, ai është më i tmerrshmi nga të gjitha”, vijon Ndrenika.

Të tjera

Abissnet