Reforma në drejtësi dhe ajo zgjedhore, në rrezik

Koço Kokëdhima

“Ka ardhur koha të reshtet së bëri lojëra dhe të realizohet Reforma në Drejtësi, të realizohet Reforma Zgjedhore, siç drejtuesit i kanë premtuar popullit shqiptar dhe njësoj si SHBA dhe populli shqiptar presin”-deklaroi sot ambasadorja e SHBA-ve në Tiranë, Yuri Kim.

‘Zgjidhja’ e përshëndet qëndrimin e diplomates amerikane, si mbështetje e aleatit të vetëm strategjik të Shqipërisë për popullin shqiptar, liritë dhe të drejtat e tij. Prej katër vitesh, ‘Zgjidhja’ e ka mbështetur domosdoshmërinë e reformës në drejtësi, por ka theksuar se ajo nuk mund të ketë sukses si produkt i marëveshjeve okulte PS-PD, aq më pak vetëm si vullnet i shumicës aktuale të zhytur në krim dhe korrupsion dhe ka theksuar se pa reformimin e institucioneve të tjera kushtetuese, shoqëria dhe sistemi ynë politik nuk mund të dalin nga agonia e këtyre tri dekadave.

Reforma në Drejtësi nuk mund të ketë suksesin e pritshëm për shqiptarët, nëse nuk reformohet sistemi ynë i vjetër politik, përmes një reforme zgjedhore të thellë dhe gjithëpërfshirëse. As qeveria e Rilindjes dhe as SHQUP-i nuk i duan drejtësinë dhe zgjedhjet e reformuara.

Çlirimi i zgjedhjeve përmes depolitizimit të plotë të administratës zgjedhore dhe rikthimit të të drejtës për të votuar me lista të hapura, do të jetë vendimtar edhe për suksesin e reformës në drejtësi. Këto dy reforma do të kenë sukses vetëm nëse bëhen me transparencë, me dakordësi kombëtare dhe gjithëpërfshirëse. Reformën në drejtësi nuk mund ta bëjë qeveria që është përgjegjëse për rrëmbimin e lirive politike, ekonomike dhe njerëzore, krimin dhe korrupsionin në çdo qelizë të shoqërisë shqiptare dhe as PD-ja që mban mbi kurriz një mal me krime politike dhe ekonomike.

Ajo nuk mund të jetë produkt i pazareve të 2-3 njerëzve që janë mëkatarët më të mëdhenj të tranzicionit 30-vjeçar. ‘Zgjidhja’ kërkon çuarjen deri në fund të procesit të Reformës në Drejtësi, plotësimin e anëtarëve të Gjykatës Kushtetuese dhe të Gjykatës së Lartë, me individë të pastër dhe me integritet profesional, për thellimin dhe konsolidimin e pavarësisë së gjyqësorit. SHBA-të duhet ta mbështesin Shqipërinë deri në fund të këtij procesi, duke ndihmuar në reformimin e plotë të sistemit politik, përmes zgjedhjeve të lira dhe të barabarta, me pjesëmarrjen e të gjithë shqiptarëve.

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/



Leave a Reply

Your email address will not be published. Required fields are marked *

Të tjera

Abissnet