Rama akuza ndaj medias, PD: Nuk ka gazetarë kriminelë, ka kryeministër që bën propagandë me fatkeqësinë

Ish-deputetja e Partisë Demokratike, Albana Vokshi, ka reaguar pas sulmeve të kryeministrit Edi Rama, ndaj mediave lidhur me raportimet e bëra për tragjedinë e 26 nëntorit, ku si pasojë e tërmetit 6.3 ballë humbën jetën 51 persona.

Përmes një postimi në rrjetin social “Facebook”, Vokshi shkruan se nuk janë gazetarët kriminelë, por se kryeministri po e përdor këtë fatkeqësi për propagandë.

Sipas ish-deputetes gazetarët kanë raportuar njoftimet e Ministrisë së Shëndetësisë, ndërsa i moshuari që humbi jetën teksa transferohej nga spitali i Durrësit në një tjetër nuk duhej të ishte lejuar nga stafi mjekësor.

Postimi i plotë:

Nuk ka gazetarë kriminelë! Ka Kryeministër që bën propagandë kriminale me fatkeqësinë

Për të mbuluar përgjegjësinë direkte për keq menaxhimin e emergjencës pas tërmetit, Edi Rama ka nisur të sulmojë gazetarët, të cilët përcjellin shqetësimet e vërteta të qytetarëve në zonat e prekura.

Nuk janë kriminelë gazetarët që raportuan njoftimin e Ministrisë së Shëndetësisë se Spitali i Durrësit po evakuohej.

Nuk janë kriminelë gazetarët pse një qytetar u lejua të zhvendoset nga spitali i Durrësit pas dhe, fatkeqësisht, humbi jetën rrugës për në Spitalin e Beratit.

Kriminale në këtë histori është përdorimi politik nga Edi Rama i tragjedisë, i tronditjes, i skamjes, i humbjes së besimit dhe sigurisë për jetën dhe banesën.

Kriminale është që të përpiqesh të shtysh edhe një ditë duke gënjyer, duke mashtruar qytetarët për të fshehur gjurmët e mëdha të krimit.

Në emër të Partisë Demokratike, inkurajoj gazetarët të mos intimidohen nga gjuha e dhunshme, e turpshme, e papranueshme e Edi Ramës.

Ngritja e zërit nga gazetarët, pro interesit publik, është arma e vetme për të zhbërë presionin kriminal të Edi Ramës.

Leave a Reply

Your email address will not be published. Required fields are marked *

Të tjera

Abissnet