Predha gjermane te shëtitorja e durrsakëve (VIDEO)

Publikuar më 19. 05. 2017 nga Shekulli Online

Një predhë gjermane e luftës së dytë botërore është zbuluar në territorin e shëtitores “Taulantia“,atje ku është dhe qarkullimi më i madh i qytetarëve dhe turistëve. Predha është zbuluar nga punonjësit e Ndërmarrjes së Pastrim Gjelbërimit, në kohën kur këta të fundit po punon për hapjen e gropave për mbjelljen e pemëve të reja.

Për ironi të fatit predha është gjetur fare pranë me Monumentin e Rezistencës Antifashiste. Sipas specialistëve, ajo është një predhë e kalibrit të rëndë që i përket artilerisë së Luftës së Dytë Botërore.

Sapo është marrë informacion nga punëtorët, menjëherë në vendngjarje kanë shkuar punonjësit e policisë bashkiake, që kanë vënë në ruajtje objektin e rrezikshëm. Po kështu, në vendngjarje kanë shkuar edhe punonjësit xhenierë, të cilët bënë transportimin e saj drejt poligonit të Porto- Romanos.

Bregdeti i Durrësit tregon se ky qytet ka qenë arenë luftimesh për pozicionin e tij strategjik të rrugëve detare.

Kjo është predha e tretë e gjetur në  një perimetër të afërt, pasi pak muaj më parë dy predha që dyshohet të Luftës së Parë Botërore u zbuluan gjatë gërmimeve te sheshi “Veliera”.

Një sasi predhash të kësaj natyre janë zbuluar dhe në territorin e Portit të Durrësit gjatë gërmimeve që po kryheshin disa vite më parë për thellimin e Portit të Durrësit.

Kompania Daneze “Rhode and Nielsen” që po merrej me thellimin e portit të Durrësit  ndërpreu punimet nga rrezikshmëria që paraqiste thellimi i portit në këto kushte dhe fondeve të reja që kërkoheshin.

Çështja më pas shkoi në gjykatën ndërkombëtare, ku vazhdoi prej vitesh odisea e gjyqeve mes palës shqiptare dhe firmës përkatëse.

Llambi Kallço