Nga distanca fizike tek biletat elektronike, si do udhëtojmë nesër në urban

Kreu i Shoqatës Kombëtare të Transportit Qytetas, Rixhin Qoshja tregon për “Shekulli”-n rregullat e reja që do të ndiqen nga pasagjerët për të marrë këtë shërbim

Enida Vërça

Për më shumë se dy muaji, transporti publik ka pezulluar punën për shkak të pandemisë Covid-19. Edhe pse hapja e vendit është bërë në mënyrë graduale dhe pjesa më e madhe e bizneseve janë rikthyer në punë, transporti publik vazhdon ende të jetë i pezulluar për shkak të rrezikut të lartë që mban ky mjet, nëse rinisë përdormi. Kreu i  Shoqatës Kombëtare të Transportit Qytetas, Rixhin Qoshja tregon për “Shekulli”-n rregullat e reja që do të ndiqen pas hapjes, zvogëlimi i kapaciteteve dhe po ashtu sistemi i biletës elektronike.

Hapja

Qoshja thotë se ende nuk ka një vendim për hapjen dhe një nga arsyet pse vazhdon ende të jetë i pezulluar ky aktivitet është reduktimi i kapaciteteve, i cili përkthehet në humbje për kompanitë e transportit. “Ende nuk ka një vendim për hapjen edhe pse kërkesa është e lartë. Ne kemi propozuar disa modele, referuar edhe vendeve në Europë. Si mund të rihapet ekonomia pa patur mundësi që njerëzit të shkojnë në punë? Ne mendojmë që ka ardhur momenti që të rinisim punën dhe jemi gati për këtë hap, por duhet zgjidhur problematika se si do të ndodhë kjo gjë. Nëse ne rihapemi, do të thotë që do të gjenrojmë humbje, jo fitim. Duke gjeneruar humbje është e pamundur që të rihapim si kompani. Patjetër që kemi klientë, por duke respektuar distancimin nuk do të kemi më kapacitetet e plota. Nëse duan transport, dikush duhet të rimbursojë humbjet tona. Fakti që jemi ende mbyllur, kjo është një nga arsyet kryesore. Në fakt edhe ne duam të fillojmë punën sa më shpejt, por për aq kohë sa nuk zgjidhen këto probleme nuk ka se si. Jemi gati që nesër, nëse këto probleme zgjidhen”, thotë ai.

Rregullat

Kreu i Shoqatës thotë se për të siguruar distancën fizike, nuk mund të hipin më shumë se 25 pasagjerë në urban. “Nga 100 persona që udhëtonin dikur, tani do të jetë 25, pra ky kapacitet është propozuar nga ne”, bën me dije ai. Sakaq thotë se një version është edhe përdorimi i biletës elektronike, e cila shmang kontaktin e pasagjerit me faturinot. “E gjithë kjo është një kosto, patjetër, por kjo do të bëhet në një mënyrë të tillë që të gjendet zgjidhja mes qeverisë, bashkisë, që të bëjnë rimbursimet në mënyrë që ky shërbim të vazhdojë”. Ndërkohë mundësisë së rritjes së biletës për këtë shërbim si kosto e shtuar në xhepin e qytetarëve, Qoshja thotë se nuk mund të ndodhë dicka e tillë.

Pagat

I pyetur nëse punonjësit e këtij shërbimi janë paguar gjatë periudhës së pandemisë, Qoshja thotë se problemi më i madh janë kompanitë e transportit, të cilat nuk kanë marrë asnjë ndihmë përveç pagesës së taksës vjetore.“Kanë marrë 40 mijë lekë nga marsi deri në fund të majit, një pjesë ende nuk e kanë marrë, janë në pritje. Ndërkohë për kompanitë nuk është dhënë asnjë ndihmë deri më tani, përveç rimbursimit të taksës vjetore nga Drejtoria e Përgjithshme e Shërbimeve të Transportit Rrugor (DPSHTR), e cila është variabël. Për një kompani që ka mbi 30 autobusë vlera e saj shkon deri në 3 milionë lekë të reja në vit”, bëri me dije ai.

Masat

Në fjalën e tij, Qoshja thotë që pjesë e udhëtimit si në çdo aktivitet tjetër, do të jenë maskat, dorezat dhe dezinfektantët. Sipas tij, nëse ato respektohen siç duhet nuk do të ketë mundësi për burim infeksioni. “Kujdesi i qytetarëve duhet të vazhdojë, jo vetëm në urban, por kudo. Mjafton të kenë mjetet mbrojtëse, ulja edhe e kapaciteteve minimizon risqet e infeksionit”.

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/



Leave a Reply

Your email address will not be published. Required fields are marked *

Të tjera

Abissnet