Tenori Pirgu merr “Zambonin”

Çmimi për lirikën “Maria Zamboni i artë 2008” i është akorduar tenorit shqiptar Saimir Pirgu, i vlerësuar nga shumë kritikë si një nga “zërat më interesantë dhe më premtues” në panoramën ndërkombëtare të operistikës. Artisti shqiptar 27-vjeçar, i cili e ka nisur karrierën në Itali, e mori çmimin dje në orën 21.15 gjatë ceremonisë zyrtare që u bë në qendrën sportive në Ponti sul Mincio, vendlindja e sopranos së madhe Maria Zamboni. Ceremonisë i parapriu perfomanca me pjesë të zgjedhura nga “Don Paskuale” e Gaetano Donizettit, me interpretimin e sopranos Sandra Foschiatto, e baritonit Andrea Mastroni dhe tenorit Vito Martino, shoqëruar në piano nga Sem Cerritelli, drejtor artistik i konkursit lirik “Qyteti i Breshas”.