“Do t’i dhuroja vajzës gjakun tim deri në pikën e fundit”

Pacientja Emine Braka vuan nga anemia, por ka bërë vetëm tre herë transfuzion. Prindërit: Kemi frikë nga gjaku i dhuruar

Fytyra e njomë dhe sytë e ëmbël të japin imazhin e një engjëlli. Një engjëll që ka zënë dyert e spitalit në Pediatrinë e QSUT-së prej disa ditësh, me shpresën se do të bëhet më mirë. Është vetëm 7 vjeçe dhe arrin të kuptojë hallin e nënës dhe të familjes së saj. Emine Braka, nga Fieri, vuan nga një sëmundje anemike por mjekët pohojnë se ajo nuk ka bërë transfuzion gjaku në mënyrë të rregullt dhe kjo i ka sjellë pasoja të tjera shëndetësore. Ndërsa nëna e saj pohon se është e gatshme t’i japë gjakun e saj të bijës deri në pikën e fundit, por ka frikë t’i bëjë transfuzion gjaku nga të tjerët, pasi i trembet ndonjë sëmundjeje që mund të marrë. Madje nuk harron të detajojë edhe shpenzimet që i duhen për të kuruar të bijën. Ndërkohë mjekët theksojnë se ndeshen shpesh me prindër që kanë frikë t’u bëjnë transfuzion fëmijëve që kanë nevojë për gjak, por nga ana tjetër kjo është tepër e dëmshme për ta.

Transfuzioni

“Kam shumë frikë t’i jap gjak të huaj. Kam frikë se vajza do më marrë sëmundje të rëndë, se vjet një fëmijë nga Fieri vdiq nga SIDA që kishte marrë nga transfuzioni i gjakut”,- pohon nëna e 7-vjeçares Emine Braka. Mjaftojnë vetëm këto fjalë për të kuptuar krizën e mosbesimit që ka ky prind ndaj sigurisë së gjakut, krizë që e pengon atë t’i bëjë transfuzion të bijës. Ajo pohon se vajza e saj ka bërë transfuzion vetëm 2 herë dhe këtë vetëm kur e ka patur të domosdoshme. Ndërsa shefja e shërbimit të Pneumo-Alergologjisë në Pediatri, Luljeta Kote pohon se vogëlushja ka pësuar pneumoni dhe një ndër shkaktarët është edhe fakti se ajo nuk ka bërë transfuzion gjaku në mënyrë të rregullt. “Ka patur nevojë të marrë gjak më shpesh dhe tani po mjekohet për pneumoni”, -pohon mjekja duke shpjeguar se fakti që nuk merr gjak, bën që t’i bie hemoglobina duke sjellë edhe rënie të rezistencës së trupit. Ndërkohë, nëna e vogëlushes pohon se transfuzion ka bërë vetëm tre herë dhe vetëm kur e ka rrëzuar temperatura e lartë. “Jam e gatshme t’i jap gjakun tim deri në pikën e fundit, por t’i bëj transfuzion, kam frikë”,- thekson nëna e Eminesë.

Shpenzimet

Paguan për çdo gjë, madje edhe për sasinë e gjakut që ka marrë tre herë kur ka bërë transfuzion. Kështu nëna e pacientes shpjegon se prej 4 vitesh, shpenzon me vajzën e saj rreth 40 mijë lekë në muaj me barnat që i blen, që janë vitamina C, E dhe Acidin Florik. “Edhe kur ka bërë transfuzion gjaku në Lushnje, kemi paguar për gjakun që ka marrë edhe pse duhet të merret falas”,-pohon nëna e pacientes. Ndërkohë, ajo thekson se me të ardhurat që ka familja e saj e kanë të vështirë për të përballuar shpenzimet që i duhen për të mjekuar të bijën.

Sipas mjekëve, nëse pacientët nuk bëjnë në mënyrë të rregullt transfuzionin e gjakut, rrezikojnë shëndetin

Mjekët: Prindërit kanë krizë mosbesimi tek gjaku i dhuruar

Frikë dhe mosbesim në gjakun që duhet të marrin fëmijët e tyre. Kjo i pengon disa nga prindërit që t’i dërgojnë fëmijët e tyre për të bërë transfuzionin e gjakut. Sipas mjekëve është tepër e domosdoshme për fëmijët me anemi gjaku apo talasemi që të bëjnë në mënyrë të rregullt transfuzion, në të kundërt, kjo do të sjellë pasoja ende më të rënda për fëmijët e tyre. “Duke mos bërë në mënyrë të rregullt transfuzionin e gjakut, këtyre fëmijëve iu bie në mënyrë të vazhdueshme rezistenca e trupit, pasi ata kanë nevojë që t’u rritet hemoglobina”,- shpjegojnë mjekët specialistë, duke shtuar se çdo vonesë në marrjen e gjakut është në dëm të pacientëve. Kështu, mjekja e shërbimit të Alergo-Pneumologjisë në Pediatri shpjegon se, me rastet kur fëmijët nuk marrin gjak në mënyrë korrektë janë ndeshur disa herë. “Është e padiskutueshme që këta fëmijë duhet të marrin gjak kur iu nevojitet, në të kundërt, do t’u shfaqen sëmundje të tjera, duke iu dëmtuar akoma më shumë shëndeti”,- thekson ajo duke shtuar se prindërit, në këto raste, është mirë që ta mposhtin frikën që kanë për t’u bërë transfuzion fëmijëve të tyre. Kështu shprehen edhe mjekët e tjerë, të cilët pohojnë se prindërit nuk duhet të jenë indiferentë ndaj këtij problemi.

Zenelaj: Prindërit me të drejtë nuk kanë besim te siguria e gjakut

Të gjithë prindërit e fëmijëve që kanë sëmundje për të cilat nevojitet transfuzioni i gjakut, kanë të drejtë të frikësohen për sigurinë e gjakut. Kështu u shpreh Kryetari i Shoqatës së Talasemikëve, Musa Zenelaj, i cili thekson se siguria e gjakut që marrin pacientët e vegjël nuk ka siguri. “Mendoj se kanë ndodhur ngjarje të mjaftueshme që prindërit të humbasin besimin tek siguria e gjakut dhe e theksoj se, të gjithë prindërit kanë frikë se mos fëmijët e tyre përfitojnë ndonjë sëmundje tjetër nga gjaku i infektuar që mund të dhurohet”,- thekson Zenelaj. Sipas tij, problemi me të cilin ndeshen këta pacientë është edhe fakti që gjaku është i pamjaftueshëm dhe se fëmijët nuk marrin sasinë e nevojshme gjatë transfuzionit. Me këto mangësi, thekson Zenelaj, fëmijët talasemikë dhe fëmijë të tjerë që kanë nevojë për gjak po përballen prej kohësh dhe se ende nuk janë marrë masa për t’i dhënë fund këtij problemi madhor që po mundon këta fëmijë.