Kartëmonedhat 100 e 200 lekëshe së shpejti jashtë qarkullimi

Kartëmonedhat e prerjes 100 lekë dhe 200 lekë do të tërhiqen nga qarkullimi dhe do të zëvendësohen me monedha hekuri

Banka e Shqipërisë do të tërheqë nga qarkullimi kartëmonedhat e prerjes 100 lekë dhe atë 200 lekë . Sipas zyrtarëve të BSH, tërheqja nga qarkullimi i kartëmonedhave do të vazhdojë deri më 31 dhjetor të 2010 dhe do të bëhet në dy faza. Në fazën e parë do të kryhet heqja e kursit ligjor, çka do të thotë që kartëmonedhat e përcaktuara më lart do të vazhdojnë të kenë kurs ligjor, pra do të mund të përdoren si mjet pagese për likuidimin e transaksioneve tregtare dhe shërbimeve deri më datë 31 dhjetor të 2008. Pas kësaj date, ato nuk mund të përdoren më për qëllimet e sipërpërmendura, duke mos u pranuar më si mjet pagese. Prerjet e kartëmonedhave që do të hiqen nga qarkullimi janë prerja 100 lekë, emetim i viteve 1993, 1994, 1996, imazhi i "Luftëtarit Kombëtar"; kartëmonedha e prerjes 100 lekë, emetim i vitit 1996, imazhi i "Fan S.Noli" dhe kartëmonedha të prerjes 200 lekë, emetim i viteve 1992,1994 dhe 1996, imazhi i "Ismail Qemalit".

Kartëmonedhat do të këmbehen në monedha metalike pranë sporteleve të bankave të nivelit të dytë pa pagesë. Bankat e nivelit të dytë janë të udhëzuara që në periudhën 1 janar të 2009 deri më 31 dhjetor të 2010, të pranojnë nga të gjithë personat fizikë dhe juridikë me këmbim, prerjet e mësipërme, kundrejt vleftës së plotë fillestare (vlerës nominale), me monedha kombëtare të qarkullimit. Ky vendim mbështetet në ligjin “Për Bankën e Shqipërisë”, në pikën "Për hedhjen në qarkullim të prerjeve të reja të kartëmonedhave dhe monedhave kombëtare e për tërheqjen nga qarkullimi të parasë".