Krerët lokalë: Nuk mund të bëjmë adresat dhe kartat

SHKODËR- Drejtues të njësive të qeverisjes vendore të qarkut të Shkodrës kanë shprehur rezerva lidhur me realizimin e projekteve për sistemin e adresave, aplikimin e qytetarëve për kartat e identitetit dhe shpërndarjen e certifikatave të printuara. Gjatë një takimi të zhvilluar në zyrën e prefektit të qarkut Shkodër, Maxhid Cungu, është kërkuar përshpejtimi i marrjes së masave për realizimin e këtyre projekteve.

Drejtuesit e njësive të qeverisje vendore të pranishëm në takim janë shprehur se kanë informacion lidhur me ecurinë e këtyre projekteve, por realizimi i tyre paraqet disa vështirësi. Sipas kryetarit të Bashkisë të Vaut të Dejës, Gjon Marku harta e territoreve të njësive vendore ka pasaktësi të mëdha gjë e cila nuk na lejon specialistët që të punojnë normalisht me projektin e adresave.

Ndërsa në lidhje me logjistiken e zyrave dhe të bazës materiale për aplikimin e qytetarëve për kartat e identitetit, disa njësi vendore nuk e kanë luksin që të bëjnë sërish rikonstrusionet e duhura pasi nuk kanë mjetet e nevojshme financiare. “Madje edhe pse na u kërkua me urgjencë vitin e kalkuar që të bëhet rikonstruksioni i zyrave të gjendjes civile, duka na premtuar edhe financimet nga shteti. Për këto neve kemi paguar para nga xhepi studiove të ndryshme për t’i përfunduar në kohë, por paratë edhe sot e kësaj dite nuk ka kanë mbërritur”,- pohoi kryebashkiaku i Vaut të Dejës. Rezerva ka paraqitur dhe kryetari i bashkisë së Pukës, sipas të cilit mungesa e fondeve nga shteti e bën të vështirë sistemimin në ndërtesa të përshtatshme të zyrave të gjendjes civile dhe me kushte sigurie të domosdoshme.