Fier, vajza 3 vjeç mbytet në fuçinë me ujë

FIER- Dy viktima janë regjistruar në qarkun Fier mesditën e djeshme. Një vajzë trevjecare me inicialet M. M është mbytur në një fuçi me ujë përballë banesës së saj në fshatin Lavdan të rrethit Mallakastër. Ajo ishte fëmija e vetme e familjes Maraj. Dëshmitarët pohuan se vajza ishte duke luajtur në shkallët e shtëpisë përdhese dhe ka përfunduar në pajisjen e mbushur me ujë duke u mbytur. Ajo është gjetur e pajetë nga prindërit e saj Violeta dhe Sefret. Policia ka konfirmuar se shkaku i vdekjes së vogëlushes ka qenë mbytja aksidentale në ujë.

Ndërsa rreth orës 15.00 të po kësaj dite në aksin rrugor Fier-Vlorë është gjetur i varur një shtetas i seksit mashkull, i moshës rreth 20 vjeç. Policia ka mbërritur në vendngjarje së bashku me grupin e ekspertëve. Trupi i pajetë është gjendur i varur në një degë ulliri nga një çift bashkëshortësh që po punonin në ullishte. Policia nuk ka dhënë asnjë version në lidhje me ngjarjen. Dyshohet se i riu është vetëvarur në kushtet e depresionit. Gjatën kontrollit në trupin e 20-vjeçarit nuk është gjendur asnjë dokument për identifikimin e tij. Trupi i pajetë është dërguar në morgun e qytetit për ekzaminime të mëtejshme nga mjeku ligjor.