Predha i hoqi dritën e syve, padit Ministrinë e Mbrojtjes

Historia e Ilir Havales, djalit që humbi shikimin nga shpërthimi i predhës së ushtrisë. “Dua dëmshpërblim për mjekimet”

TIRANË- Ilir Havalja ishte vetëm 17 vjeç, kur bashkë me dy kushërinjtë e tij, Gentian dhe Hamit Çupin, ishin nisur për të prerë dru, pak metra larg banesave të tyre afër poligonit të qitjes së repartit ushtarak të artilerisë, në periferi të Tiranës. U kthye që andej me duar të gjymtuara dhe shikim të humbur. Shkak për këtë gjymtim ishte bërë një predhë e pashpërthyer, e hedhur nga ushtria në faqen e malit, ku ata kishin vendosur të prisnin dru për dimër. Që nga ajo pasdite e 29 tetorit 2005, Ilirimbeti i gjymtuar dhe pa sy. Iu deshën gati tre vite mjekim, për ta marrë disi veten e për t’iu drejtuar Gjykatës së Tiranës me një padi civile kundër Ministrisë së Mbrojtjes, prej së cilës kërkon dëmshpërblim për shëndetin e tij.

***

Sipas kërkesë- padisë që mban numrin 8315 dhe ndodhet mbi tavolinën e punës së gjyqtares Elbana Lluri, i riu kërkon dëmshpërblim për dëmtimet në shëndet në vlerën e 9.600.000 lekëve të reja. “Të njihen shpenzimet për përkujdesjen, për një kohë të plotë, 24 orë në ditë.Dëmshpërblimi të bëhet në masën e pagës të një punonjësi infermier - sanitar. Të njihen shpenzimet për mjekimet e nevojshme dhe trajtimet e ndryshme mjekësore që mund të ketë nevojë në institucionet e vendit e jashtë tij. Shpërblimi për dëmin moral që ka të bëjë me humbjen e kënaqësive për jetën, dhimbjet e brendshme, vuajtjet shpirtërore apo gjendjen e ankthit a mundimin shpirtëror që më janë shkaktuar mua apo familjarëve të mi”,-thuhet në padinë e Ilir Havales. Paraditen e djeshme, në Gjykatën e Shkallës së Parë ishte seanca e dytë gjyqësore, ku i riu, nën shoqërimin e nënës së tij vjen para gjyqtares së dosjes për ndjekjen e gjyqit të tij kundër Ministrisë së Mbrojtjes. Gjatë seancës së parë, dosja nuk u shqyrtua për shkak të mangësive që kishte kërkesë -padia, por me riformulimin e saj, gjyqtarja Lluri deklaroi të hapur shqyrtimin gjyqësor duke i dhënë kohë juristëve të Ministrisë së Mbrojtjes dhe Avokaturës së Shtetit të përgatiten në lidhje me pretendimin e paditësit Ilir Havalja.

***

Avokati i familjes Havalja lexoi kërkesë- padinë, ku kërkoi që Gjykata të detyrojë Ministrinë e Mbrojtjes të paguajë dëmin e shkaktuar, pasi sipas kërkesë-padisë, në zonën ku i riu është gjymtuar nuk kishte të vendosura shenja të ndërgjegjësimit të popullatës për një zonë të minuar apo zonë ushtarake. Vetë i riu, që gjithë kohës shoqërohej nga e nëna e tij, kërkoi nga gjykata që Ministria e Mbrojtjes t’i kthejë jetën, sytë dhe duart. “Kërkoj nga Ministria e Mbrojtjes të marrë përsipër mjekimin tim jashtë shtetit apo këtu që të më kthehet shikimi. Prej tre vitesh po jetoj jetën me ndihmën e nënës dhe të afërmve që më shoqërojnë për çdo nevojë timen. Predhat e Ushtrisë më ndanë jetën përgjysmë. Jetoj me frikë, dëshpërim e ankth, nuk mund ta shijoj jetën si shokët e mi”,-tha djali i cili për të treguar se nuk mund të shikonte i heq syzat e zeza me të cilat fsheh atë që e ka pësuar nga predhat e pashpërthyera. Ndërkohë, nëna e tij, Fahrija shprehet se:“Nëse Ministria e Mbrojtjes do të kishte lajmëruar se ajo zonë është e minuar apo ushtarake, djali im nuk do të kishte hyrë aty dhe nuk do të kishte gjithë këto vuajtje”,-tha ajo me lotë në sy. Sipas kërkesë padisë, ka qenë pasditja e datës 29 tetor 2005 kur të rinjtë kanë hasur një predhë të paplasur nga qitjet e artilerisë së Ushtrisë dhe nga lëvizja e saj nga vendi për të prerë drunjtë ka sjellë shpërthimin, duke e gjymtuar Ilir Havaljen në sy dhe duar, ndërsa dy kushërinjtë e tij kanë mbetur të plagosur lehtë.

PADIA

Nr. i Çështjes:8315

Dt. e regjistrimit:26.05.2008

Paditësi:Ilir Havalja

Të paditur:Ministria e Mbrojtjes

Lloji i Çështjes:Padi Shkaktim Dëmi

Objekti:Kërkimin e dëmshpërblimit për dëmtimin e shëndetit në shumën 9.600.000 lekë. Të njihen shpenzimet për përkujdesjen për një kohë të plotë 24 në 24 orë, pagesa të bëhet në masën e pagës së një punonjësi infermier - sanitar. Këto shpenzime të llogariten për personat që do t’i shërbejnë. Të njihen shpenzimet për mjekimet e nevojshme dhe trajtimet e ndryshme mjekësore që mund të ketë nevojë në institucionet e vendit a jashtë tij. Shpërblimi për dëmin moral që ka të bëjë me humbjen e kënaqësive për jetën, dhimbjet e brendshme, vuajtjet shpirtërore apo gjendje ankthi e mundimi shpirtëror që i shkaktohen vetë paditësit dhe të afërmve të tij.