Rikonfigurimi i UNMIK-ut, Zannier takim me qeveritarët serbë

Shefi i UNMIK-ut Lamberto Zannier diskutoi sot me zyrtarët qeveritarë në Beograd rreth procesit të rikonfigurimit të pranisë civile ndërkombëtare në Kosovë. Lajmin e kanë bërë me dije sot mediat serbe.

Ministria e Jashtme e Serbisë njoftoi se Zannier ka thënë se qëllimi kryesor i UNMIK-ut është ruajtja e paqes dhe stabilitetit, ndërsa misioni i OKB-së do të punojë në bazë të neutralitetit të plotë statusor dhe vetëm në kuadër të mandatit sipas rezolutës 1244.

Ai u takua në Beograd me Ministrin e Jashtëm të Serbisë Vuk Jeremiç dhe ministrin serb për Kosovën Goran Bogdanoviç.

"Ministrat serbë edhe një herë kanë shprehur pakënaqësinë për shkak të vendimit të njëanshëm të Sekretarit të Përgjithshëm Ban Ki Moon që të fillojë procesin e rikonfigurimit pa vendim të Këshillit të Sigurimit", cituan mediat serbe njoftimin e Ministrisë së jashtme të Serbisë.(INA)