Vendimet e Strasburgut

Strasburgu ka mbetur shpresa e vetme e shqiptarëve për të zgjidhur ndonjë çështje që ka mbetur e varur prej dhjetëra vitesh në Shqipëri. E thotë Sokol Puto, Ekspert për Çështjet e Gjykatës Europiane për të Drejtat e Njeriut. “Vendi dhe shtetasit shqiptarë po paguajnë për deformimet e gjyqësorit në Shqipëri. Këtë e tregojnë edhe Vendimet e Gjykatës Europiane për të Drejtat e Njeriut në Strasburg. Buxheti i Shqipërisë ka paguar deri më sot 750 mijë euro penalitete”.

Z.Puto nuk flet për herë të parë. Pak muaj më parë, ai i bëri thirrje qeverisë që të marrë masa urgjente për të zbatuar detyrimet e përcaktuara në vendimet e Strasburgut për çështjen e pronave. Pika e dobët, mbetet ajo e çështjes së pronave, kompensimi i ish-pronarëve, të cilët edhe 15 vite pas miratimit të Ligjit të vitit 1993, nuk gjejnë zgjidhje në Shqipëri, te Agjencia e Kthimit dhe Kompensimit të Pronave. Rasti më i freskët, është ai i 4 qershorit 2008, kur qeveria vendosi të dëmshpërblejë me 49 mijë euro paditësit “Gjonboçari”, vëllezër dhe motra që nuk morën pronat e tyre dhe hodhën në gjyq Shqipërinë në Gjykatën e Strasburgut.

Si Gjonboçarët janë edhe shumë shqiptarë të tjerë. E thotë Puto: “Në plan është pagesa edhe e 1 milionë e 200 mijë eurove të tjera në favor të qytetarëve shqiptarë, që janë ankuar në Gjykatën Europiane për të Drejtat e Njeriut”. Euro që paguajnë korrupsionin e qeverive tona.