Mësuesit me kontratë, kush del dobët, ulet në detyrë

Reforma në arsim, nga viti i ardhshëm, mësuesit e rinj me kontratë njëvjeçare, me të drejtë ripërtëritjeje

Mësuesit, tani do zgjidhen nga vetë bordi i shkollave, ku vendimmarrës do jenë edhe prindërit

Reforma në arsimin publik, nuk do të konceptohej dot pa përfshirjen në të edhe të figurës dhe rolit të mësuesit, aq shumë e përfolur në vitet e fundit. Pas debatit të ngritur në shumë drejtori rajonale arsimore, lidhur mbi përmirësimin dhe sistemimin e pozicionit të drejtorit në krye të shkollave, tashmë Ministria e Arsimit dhe Shkencave, ka çelur një tjetër debat, atë të reformimit të procedurave të emërimit dhe shkarkimit të mësuesve në shkollat publike. Deri më sot, këtë të drejtë, e kanë gëzuar Drejtoritë Rajonale Arsimore, ndërsa me udhëzimin e fundit të ardhur nga MASH, është menduar që emërimi dhe shkarkimi i mësuesve, të jetë kompetencë e shkollave dhe askujt tjetër. Për këtë qëllim, duke nisur nga viti i ardhshëm, në çdo shkollë, si në arsimin e detyruar 9-vjeçar, ashtu edhe në atë të mesëm 3-vjeçar, do të ngrihet një komision i posaçëm, që do të ketë për detyrë të pranojë ose shkarkojë mësuesit nga puna. Megjithëse në letër skema për emërimin dhe shkarkimin e mësuesve duket e thjeshtë, ajo nuk do të jetë e tillë në praktikë. Kjo pasi për të kryer dy proceduarat e mësipërme, do të kërkohet mirëkuptimi i një sërë aktorësh, që do të jenë pjesë e komisionit të shqyrtimit të aplikimeve.

***

Drejtoritë Arsimore Rajonale, do të kenë rol të kufizuar në emërimin dhe shkarkimin e personelit shkollor në arsimin publik. Udhëzimi i fundit i nxjerrë nga Ministria e Arsimit, ia kalon kompetencat e mësipërme, Komisionit të Shqyrtimit të Aplikimeve, i cili kryen funksionet e tij në çdo shkollë të arsimit publik. Komisioni, i cili përbëhet nga 5 anëtarë, do të drejtohet nga nëndrejtori i shkollës. Në mungesë të tij, detyra për drejtimin e grupit të punës, i kalon automatikisht drejtorit të shkollës. Krahas nëndrejtorit, komisioni do të ketë në përbërje të tij edhe kryetarin e bordit të shkollës. Kryetari i bordit, ka të drejtë që në mungesë të tij, të drejtën për të qenë përfaqësues i bordit, ia kalon njërit anëtar, i cili është prind. Të drejtën e përfaqësimit në Komisionin e Shqyrtimit të Aplikimeve, do ta kenë edhe Drejtoritë Arsimore Rajonale. Ministria e Arsimit, ka vendosur që në përbërje të çdo komisioni, të jetë edhe një specialist i DAR/ZA-ve. Duke parë specifikën e profilit të mësuesit, në komision është vendosur që shkolla të përfaqësohet edhe nga kryetari i ekipit lëndor si edhe një mësues i lëndës, të cilët do të kenë për detyrë të kalojnë në sitë, përgatitjen e mësuesve që aplikojnë për një vend pune në shkollë.

***

Për të fituar një vend pune në arsimin publik, mësuesit e rinj duhet të paraqesin në drejtorinë e shkollës paketën e aplikimit të përcaktuar nga MASH. Në këtë paketë do të jenë të përfshira dokumente që vërtetojnë përfundimin e studimeve, trajnime të kryera nëse disponon të tilla, si edhe eksperiencë pune, nëse ka një të tillë të shoqëruar me relacion me shkrim nga punëdhënësi i mëparshëm. Të drejtën për të shqyrtuar kërkesat e mbërritura, e ka vetëm Komisioni i Shqyrtimit të Aplikimeve i ngritur në shkollë, i cili përzgjedh midis morisë së alternativave vetëm dy prej tyre. Pas përfundimit të kësaj procedure, komisioni ia kalon dy kandidaturat e përzgjedhura drejtorit të shkollës, i cili pas rishqyrtimit të dokumentacionit emëron vetëm njërën prej tyre. Procedura e mësipërme, do të jetë e vlefshme edhe për përzgjedhjen e personelit në kopshtet publike.

***

Ndryshe nga skema e vjetër e emërimit dhe shkarkimit të personelit shkollor, skema e re e propozuar nga MASH, nuk ia garanton vendin e punës asnjë arsimtari të ri që do të emërohet në arsimin publik parauniversitar dhe atë parashkollor. Çdo arsimtar i emëruar në arsimin publik, duke nisur nga viti i ardhshëm shkollor, do të nënshkruajë kontratë pune me drejtorin e shkollës, ku është përzgjedhur. Në këtë kontratë, do të jenë të përcaktuara rregulla të qarta, ku vazhdimësia e arsimtarëve do të jetë e varur nga performanca që ata do të kenë në mësimdhënie. Performanca do të merret si bazë nga drejtorët e shkollave, edhe në ripërtëritjen e kontratës. Në këtë rast, drejtori i shkollës, pas mospërtëritjes së kontratës, ka të drejtë të shpallë kërkesë për mësues tjetër. Udhëzimi i Ministrisë së Arsimit, sqaron se kjo e drejtë lind vetëm në rastet kur; mësuesi nuk ka diplomën që kërkon vendi i punës, bordi i shkollës propozon shpalljen e kërkesës për një mësues tjetër, mësuesi ka shkelur pika të kontratës si edhe kur arritjet e nxënësve të mësuesit në vlerësimet e jashtme konsiderohen të ulëta. Gjithsesi, udhëzimi shprehet qartë se drejtori shpall kërkesën për marrjen ose jo të një mësuesi në shkollë, vetëm pasi këshillohet me komisionin e shqyrtimit të aplikimeve dhe jo me dëshirë vetëm të tijën. Më pas do të jetë vetë komisioni i cili do të shqyrtojë respektimin ose jo të kontratës nga mësuesi.