Bush hap samitin SHBA-BE në Slloveni

Presidenti i Shteteve të Bashkuara Xhorxh Bush hapi sot samitin me Bashkimin Evropian. Ky është samiti i fundit për presidentin e Shtëpisë së Bardhë, para se të largohet nga posti në janar 2009.

Bush po zhvillon takime me liderët e BE-së në Slloveni, si vend kryesues i radhës së Unionit. Ai pritet të kërkojë nga liderët evropianë më shumë ndihmë për Afganistanin, presion më të madh ndaj Iranit dhe më shumë bashkëpunim në çështjen e ndryshimeve klimatike.

Më herët, Shtëpia e Bardhë tha se edhe Kosova do jetë njëra nga temat që do të diskutohet në turneun evropian të presidentit Bush.

Pasdite, Bush do të udhëtojë në Gjermani ku do takohet me kancelaren Angela Merkel, ndërsa të enjten në Paris do të marrë pjesë në konferencën ndërkombëtare të donatorëve për Afganistanin.