Atak në zemër, vdes në liqen 22-vjeçari

Pogradec- Hyn për t’u freskuar në liqen, por humbet jetën brenda në ujë. Ngjarja është shënuar në Pogradec, duke regjistruar kështu edhe viktimën e parë të kësaj vere në liqen.

Sipas burimeve të policisë, viktima është 22-vjeçari, Mexhit Çollari nga fshati Urakë i Përrenjasit. Ai së bashku me shokun e tij Viktor Toçka janë nisur nga fshati Urakë në drejtim të Pogradecit për plazh. Pasi kanë qëndruar për disa orë në diell hynë në ujë për t’u freskuar.

Sapo kanë bërë disa metra not, 22-vjeçari është zhytur dhe nuk po dilte nga uji. Në këto rrethana shoku i tij ka shkuar me shpejtësi, por e ka gjetur pa shenja jete. Edhe pas përpjekjeve për t’i bërë frymëmarrje artificiale, asgjë nuk ka ndryshuar.

Sapo janë lajmëruar të afërmit, trupi i të ndjerit është tërhequr në drejtim të banesës pa iu nënshtruar autopsisë. Ndërkohë, policia është drejtuar në fshatin e viktimës për ekspertizën mjeko-ligjore.

Nga të dhënat hetimore ka rezultuar se i riu nuk ka vdekur si pasojë e mbytjes në liqen, por si pasojë e një goditjeje në zemër.