Infeksionet në shtatzëni, kur e rrezikojnë bebin

Publikuar më 12. 01. 2018 nga Jola Alimemaj

Nga Elona Tereziu

Infeksionet mykotike vaginale dhe ato të traktit urinar, shpjegimet e Lindita Myzyrit, mjeke obstetër-gjinekologe, se si këto ndikojnë te bebi duke u bërë shkak për aborte, lindje të parakohshme apo bebe nënpeshë. Rëndësia e higjienës personale si një faktor kontribuues bazë në instalimin e tyre.

Një femër gjatë shtatzënisë kalon një kalvar problemesh psiko-fizike të cilat e bëjnë edhe më të vështirë këtë periudhe të jetës. Një ndër problemet më të shpeshta janë infeksionet mykotike vaginale si dhe ato të traktit urinar. Lindita Myzyri, mjeke obstetër-gjinekologe, tregon për gazetën “Shëndet+” se si këto infeksione ndikojnë tek bebi duke u bërë shkak për aborte, lindje të parakohshme apo bebe nënpeshë. Më tej ajo thekson rëndësinë e higjienës personale si një faktor kontribuues bazë në instalimin e tyre.

Cilët janë infeksionet më të zakonshme që hasen tek femrat gjatë shtatzënisë?

Shtatzënia është një proces fiziologjik/ biologjik normal, mirëpo, për shkak të  hormoneve femërore në organizëm (estrogjeni dhe progresteroni, prolaktina që fillon të prodhohet në tremujorin e tretë), ndryshon balanca e hormoneve. Duke ndryshuar balanca e hormoneve, përpos faktit që gruaja ka ndryshesa të humorit të saj, ndryshon edhe pehashi i vaginës. Në kushte normale pehashi i vaginës është pehash alkaline, gjatë shtatzënisë bëhet pehash acid dhe si i tillë na jep infeksione të ndryshme. Infeksionet më të shpeshta gjatë shtatzënisë janë infeksionet mykotike, apo ajo që quhet soor mykotik, dhe nëse një soor mykotik nuk kapet në kohë/ nuk mjekohet në kohë, fillon dhe shtohen bakteret, prishet mikroflora normale e organit gjenital që ruan pehashin dhe ato bëhen më të shumta në numër, dhe nga një soor mykotik, një kolpit i thjeshtë ordiner, shkojmë në kolpite mykobakteriale që duhen trajtuar me çdo kusht. Tjetër, duke u rritur bebi, nga ana anatomike mitra vetë shtyp fshikëzën e urinës dhe femra mund të bëjë dhe infeksione urinare, të cilat janë bezdisëse dhe shqetësuese për një nënë shtatzënë.

Sa e rrezikojnë bebin këta infeksione?

Nëse nuk kapen dhe trajtohen në kohë, në tremujorin e parë infeksionet bëhen shkak për aborte. Në tremujorin e dytë dhe në tremujorin e tretë ndikojnë në lindjen e parakohshme ose të një bebi nënpeshë. Gjithashtu ndikojnë në aneminë e bebit, pra që ai të bëhet anemik.

Cilat janë ankesat/ me çfarë simptomash shoqërohen ato?

Në rastin e infeksioneve mykotike gruaja ankon për të kruajtura nga poshtë, shtim të sekrecioneve, sekrecione të ujshme, më ngjyrë dhe që vijnë erë. Normalisht çdo femër ka sekrecione vaginale të cilat e mbajnë organin të lubrifikuar, por janë të pastra.

Në rastin e infeksioneve urinare, gruaja ankon urinimin e shpeshtë dhe djegie gjatë urinimit. Zakonisht kjo ndodh më shpesh në tremujorin e dytë dhe të tretë sepse vezika urinare shtypet nga mitra, por që duhet të dimë ta dallojmë. Nëse jemi në tremujorin e parë dhe gruaja thotë që urinoj shpesh dhe kam djegie gjatë urinimit, patjetër që duhet të tërhiqet vëmendja e mjekut që të hulumtojë më shumë.

Sa e rëndësishme është higjiena personale në parandalimin e këtyre infeksioneve?

Jo vetëm gjatë shtatzënisë por edhe në jetën e përditshme, higjiena personale është shumë e rëndësishme. Me higjienë personale nuk do të thotë vetëm që femra të lahet mirë, të lajë të brendshmet mirë dhe t’i hekurosi ato. Nëse kjo nuk plotësohet me diçka tjetër, unë mund të them që jemi fare pa rezultat. Mënyra se si ne lahemi, mënyra e përdorimit të dorës është jashtëzakonisht shumë e rëndësishme. Anusi dhe vagina duke qenë shumë afër, afektojnë njëra tjetrën. Nëse ne kur lahemi e kalojmë dorën nga para mbrapa, ne marrim infeksione nga mbrapa dhe i kalojmë përpara dhe në këtë mënyrë infeksioni qarkullon, bëhet një rreth vicioz, dhe femra nuk shërohet asnjëherë, megjithëse mund të thotë se unë lahem, unë pastrohem, unë jam shumë e pastër dhe vërtet ashtu është, problemet me infeksionet vazhdojnë pikërisht sepse nuk e kanë këtë kulturë, apo nuk i ka këshilluar dikush se si ta përdorin dorën kur lahen. Një gjë tjetër është shumë e rëndësishme, është që femra kur urinon duhet të lahet me sapun. Këshillohet më së shumti që të përdori atë sapun që përdor për larjen e fytyrës. Kjo për shkak se nëse ajo urinon dhe bën vetëm një shpëlarje të lehtë më ujë dhe nuk lahet me sapun, urina bëhet acide/rrit aciditetin e ambientit të vaginës dhe bëhet shkak për thellimin e mëtejshëm të mykut dhe baktereve.

Cilët janë ato element që duhet të shtojë një femër në përkujdesjen e higjienës së saj, apo veshje gjatë shtatzënisë?

E para, përveç higjienës që e folëm më lart, shumë e rëndësishme është që të mbajnë veshje pambuku, mbathjet dhe reçipetat duhet të jenë të pambukta. Të jenë të lirshme, jo të shtrënguara dhe në asnjë mënyrë tanga. Jo pantallona të shtrënguara (megjithëse sot ka të posaçme me pjesën shtesë tek barku që rritet sipas moshës së shtatzënisë), jo vetëm në bel, por as në pjesën e vitheve të mos mbajnë rrip. Një rëndësi të veçantë ka dhe mënyra e të ushqyerit, stili i jetesës, kushtet social-ekonomike. Kur themi mënyra e të ushqyerit, gruaja shtatzënë ka një trajtim paksa të veçantë gjatë shtatzënisë, dhe nuk do të thotë fare nëse ke mundësi ekonomike ose jo, pasi ka dieta dhe për ata nëna që nuk kanë një ekonomi të mirë në familje. Prandaj në kartelë merret një anamnezë shumë e gjatë, bëhen shumë pyetje midis të cilave edhe ajo për kushtet ekonomike-sociale, jo për të paragjykuar gruan shtatzënë por që mjeku të ndërtojë një skemë/ strategji se si do e trajtojë këtë grua shtatzënë, si do e këshillojë në varësi të kushteve sociale, ekonomike e arsimimit. Sigurisht protokolli është i njëjtë për të gjitha, por mënyra se si i zgjedhim fjalët është shumë e rëndësishme. Nuk mund t’i themi një gruaje ha banane kur ajo nuk ka mundësi ta marrë. Nuk mund t’i themi ha brokoli çdo ditë kur nuk ka mundësi ta marrë. Por, nëse ne i themi a ke fasule në shtëpi dhe ajo thotë po, ne i themi ha fasule tre herë në ditë, sepse zëvendëson pikërisht atë që thamë më lart. Nuk mund t’i themi gruas ha djathin në mëngjes, drekë, darkë, por nëse e pyesim a ke gjizë, dhe ajo thotë po, i themi ha një lugë gjelle gjize në mëngjes, drekë dhe darkë.

Trajtimi?

E para femrës i jepen këshillat se si të lahet, çfarë të mbajë, çfarë të veshi. Në varësi të dëmtimi të organit, shkallës së infeksionit, patjetër që mjekohet.  A zgjat? Kjo është në gjykimin e mjekut. Mund të zgjasë 3 deri në7 ditë mjekimi dhe siç e theksuam më lart, mund të mjekohet vetëm femra shtatzënë, por në të shumtën e rasteve duhen mjekuar të dy partnerët.

Disa këshilla?

E para, kujdes me higjienën personale. Është e para dhe kryesorja, sepse ndryshimin e hormoneve nuk e shmangim, është biologjik, normal, fiziologjik. Kujdes me veshjet, përdorni vetëm veshje të pambukta dhe jo të shtrënguara. Shmangni përdorimin e linesve ditore sepse bëhen shkak për favorizimin e mëtejshëm të infeksioneve ordinere vaginale, qoftë mykotike, bakteriale, apo për infeksionet e rrugëve të poshtme urinare. Për shqetësimin më të parë drejtohuni tek mjeku.

“Mënyra se si ne lahemi, mënyra e përdorimit të dorës është jashtëzakonisht shumë e rëndësishme. Anusi dhe vagina, duke qenë shumë afër, afektojnë njëra tjetrën”.