Mark Marku: Zgjedhjet në fakultet u manipuluan

Publikuar më 13. 12. 2017 nga Jola Alimemaj

Nga Lindita Bushgjokaj

Vijonë polemikat edhe pas konfirmimit të dekanit të ri Sabri Laçi në Fakultetin Histori-Filologji. Rrëfimi i pedagogut të Gazetarisë për votimin e pasuesit të Valentina Dukës dhe akuza e studentit se tentoi të kapi për fyti kryetaren e komisionit të votimit

Në ambientet e Fakutetit Histori-Filologji, disa ditë pas votimit për dekan, vazhdojnë ende tensionet nga pedagogë dhe vëzhgues të komisionit, të cilët kanë versione të ndryshme për vendimet që nxorën fituesin. Pedagogu Mark Marku ka rrëfyer për gazetën “Shekulli” versionin e tij, se si u bë procesi zgjedhor dhe thekson se ka pasur manipulim të votave nga komisioni. Gjithashtu ai tha, se këto presione kanë qenë nga forca të jashtme, që duan të mbajnë status quon-ë e universitetit dhe të kenë ndikim mbi përzgjedhjen e kandidatëve.

Z.Marku, si fillim duam te dimë sesi shkoi procesi i votimit, ndarja e qendrave të votimit dhe sa peshë kishte secila? 

Fakti që u zgjodhën këta kandidatë është sepse në fakultet vetëshpallen me vullnetin e lirë. Kandidatët bëjnë fushatën e tyre, janë institucionet, komisioni zgjedhor i fakultetit dhe komisioni institucional i zgjedhjeve që është KiZ-i, që garantojnë standartet zgjedhore. Të dyja këto institucione u verifikua, që jo vetëm nuk garantojnë standartet, por shkelin ligjet. Janë të provuara praktikisht këto shkelje ligjore.

Ku janë shkeljet e ligjit?

E para: KiZ-i i ka hequr të drejtën një personeli me kohë të plotë që të votojë në zgjedhje, gjë që ligji e ka saktësisht të qartë, se kush voton dhe kush nuk voton. Voton gjithë personeli në fakultet, përjashton nga e drejta e votimit  vetëm ata që kanë dalë në pension dhe që janë me kontratë. Pra, ligji nuk krijon asnjë mundësi për interpretim. KiZ-i, me vetëdije, duke e njohur shumë mirë rregulloren e ka përjashtuar këtë kandidat. Kjo është shkelja e parë dhe është një fakt i provuar, se nuk do flisja pasi edhe unë mbaj përgjegjësi. Rasti i dytë, mendoj që ishte edhe më flagrant, ka të bëjë me ndërhyrjen e KIZ-it në rastin e votimit të studentëve. Dy përfaqësues të KIZ-it erdhën dhe kërcënuan studentët për të votuar, morën rolin e policit dhe filluan ‘ti kontrollonin. E para, ata ishin studentë që po prisnin aty dhe nuk po futeshin në kutitë e votimit pa radhë, ndërsa këta përfaqësues të KIZ-it u angazhuan me kërcënime ndaj studentëve. Kjo është e verifikuar dhe janë mbi 200 studentë dëshmitarë.

Kë përkrahte KIZ-i, sipas jush?

KIZ-i mendoj se përkrahte ruajtjen e gjendjes aktuale në fakultet, strukturat e vjetra që kanë drejtuar fakultetin dhe që janë një kastë, do të thoja dhe mafioze, të cilët e mendojnë fakultetin si pronë të tyre, nëpërmjet presioneve dhe favoreve kërkojnë të manipulojnë votën universitare. Të njëjtën gjë donin të bënin edhe në fakultetin tonë.

Në këtë garë ishin dy kandidatë, konkretisht znj.Aljula Jubani, e departamentit të letërsisë dhe z.Sabri Laçi, i departamentit të gjeografisë. Ju po flisni për favore dhe manipulim nga KIZ-i,  por cilin kandidat përkrahte konkretisht sipas jush?

Ah, e gjitha ishte në favor të kandidates kundërshtare të Sabri Laçit. Pra, ka pasur shumë shkelje ky proces zgjedhor, por unë po them shkeljet më flagrante të ligjit. Mbas votimit u verifikua se shkelja më e rëndë që ka ndodhur, një fenomen që ka ndodh edhe herë të tjera, por këtu u zbulua, pasi qendrat e votimit ishin ndarë; Qendra votimi të pedagogëve dhe të studentëve. U verifikua se një pedagogu i ishte vënë për votim një fletë votimi studenti. Kjo është bërë qëllimisht për të manipuluar rezultatin, sepse vota ishte për Sabri Laçin, domethënë ata kanë gjetur një kandidat si mbështetës të tij dhe i kanë dhënë votën për ta zhvlerësuar atë. Një pedagogu as që i shkon në mendje se kolegët e vet, anëtare të komisionit mund të jenë aq manipulues dhe aq pa dinjitet moral, sa t’i japin një fletë studenti për të zhvlerësuar votën.

Si i ka shpëtuar kjo sipas jush syrit vëzhgues dhe nga kush është bërë ky manipulim që flisni?

Rregullorja që ka ardhur nga KIZ-i thoshte se vulën dhe verifikimin e fletëve e bën kryetarja e komisionit. Problemi është se komisionit i ka shpëtuar, sepse mund të ketë dalë jashtë njëri nga anëtaret e komisioni për nevoja personale. Nuk mendohet se një kolegu mund t’i bëhej një manipulim, pasi ishte shumë e rëndë. Konkretisht nuk e di, por me ligj vulën dhe përgjegjësinë për fletën e pedagogëve e ka kryetarja e komisionit që ka qenë Rozana Rushiti.

Kryetares së komisionit i ka shpëtuar ky rast flagrant apo ishte e qëllimshme sipas jush?

Nuk e besoj. Nuk ka pse t’i shpëtojë, sepse ajo ishte qendra e votimit të pedagogëve dhe nuk ka sesi të fluturojë një fletë nga qendra e votimit të studenteve, pasi komisioni i qendrës së votimit të pedagogëve ka qenë tjetër nga komisioni i votimit të studenteve. Ta zëmë se ishte gabim njerëzor. Në momentin e parë anëtarët e komisionit diskutuan dhe e pranuan këtë manipulim, vendosen ta konsideronin fletën si gabim njerëzor. Pasi e kanë shpallur një herë të vlefshme e kanë konsideruar gabim njerëzor në unanimitet, pastaj është kthyer kryetarja e komisionit dhe ka thënë jo, nuk do ta quajmë të vlefshme. Unë isha në gjendje të rëndë emocionale dhe do ta rikthejmë dhe një herë votimin për fletën e vlefshme.

Ka edhe versione nga ana e palës tjetër, përkrahës të znj.Jubani dhe thonë se ju së bashku me z.Laçi keni ndërhyrë me forcë në procesin e votimit dhe keni ushtruar presion mbi kryetaren e këtij komisioni. Është e vërtete?

Kurrë! Në momentin kur është manipuluar procesi, ne kemi ardhur së bashku me pedagogë dhe kandidatë dhe ju kemi thënë vëzhguesve hyni brenda, sepse është shkelje ligji dhe nuk kanë të drejtë ata që t’ju nxjerrin jashtë. Asnjë person jashtë vëzhguesve dhe kandidateve të tjerë nuk ka hyrë në qendër votimi, përfshi mua dhe pedagogët e tjerë. Nëse dikush vërteton se kemi hyrë në sallë përveç kur kemi votuar, unë jap dorëheqjen direkt nga puna. Në momentin kur kemi shkuar dhe ju kemi thënë vëzhguesve hyni brenda se po shkelin ligjin, ka dalë kryetarja e komisionit nga salla dhe i kemi thënë se pse nuk lejoni që të futen vëzhguesit? Tha: Jo, ne i nxorëm se kështu vendosem. Nuk mund të vendoset në kundërshtim me ligjin. Kam pasur ligjin në dorë në korridor dhe i kam thënë: Zonjë, nëqoftëse ti largon vëzhguesit nga salla ke shkelur ligjin dhe mban përgjegjësi penale. Këtu ka konsistuar presioni.

Cili ka qenë reagimi i znj.Rushiti?

Ajo u tërhoq dhe u futën vëzhguesit në sallë. Mendoje se çfarë serioziteti ka pasur ai komision, që një herë e ka shpallur fletën të vlefshme, pastaj të pavlefshme. I njëjti komision që ka mashtruar pedagogun, sepse aty vërtet është një fletë që është mashtruar një pedagog, por mendo që hipotetikisht çdo pedagog i fakultetit është mashtruar. Nuk e dimë se cili prej nesh është mashtruar? Kujt i është bërë mashtrimi?

Çfarë ka ndikuar në ndryshimin e dyte të vendimit për fletën nga znj.Rushiti? Është ndikuar nga presioni ligjor që ju thoni?

Më pas ka marrë urdhra nga ajo kasë që të fola në fillim, të cilët e konsiderojnë universitetin si pronë të tyren dhe ju thonë: “Bëni çfarë të doni, sepse ju mbrojmë ne”. Keni parasysh, se ne për këto çështje do ti drejtohemi prokurorisë, sepse unë e konsideroj votën të shenjtë, por në këtë rast edhe në qoftëse nuk e bën kandidati pjesëmarrës në zgjedhje, ne si forum do ti drejtohemi prokurorisë me gjitha provat për shkelje ligjore dhe kurrë nuk ka për t’u falur kjo padrejtësi. Pasi duhet të kuptojnë një herë mirë të gjithë ata që janë nëpër komisione, se nuk mund të manipulojnë votën e kolegëve.

Ka zëra që thonë se z.Laç i është me partinë Socialiste dhe konkurrentja znj.Jubani është me Partinë Demokratike. A është ky një konstatim që të shtyn të mendosh për përkrahje nga forcat politike?

Ka vetëm një fakt që kandidatja e tjetër, znj.Aljuja është e përfshirë në strukturat e PD-së në komisionin e arsimit. Mua nuk më intereson fare se më kë parti janë, pasi çdo pedagog ka bindjet e veta politike.

Nëse ne mendojmë se z.Sabri Laçi është me forcën e majtë, këta zëra mund ta konsiderojnë si të favorizuar në këtë proces votimi?

Ne kemi etikë që mos të pyesim një koleg për prirjet e tyre politike. Ky proces zgjedhor nuk ka pasur lidhje me politiken.

Pse mendoni se ka qenë më e favorizuar kandidatja znj.Aljula Jubani?

Unë e di që ajo është mbështetur nga Velentina Duka, që sot është deputete e PD-së. I vetmi problem etik që kemi në si pedagogë është se, as Valentina Duka, as Shezai Rrokaj nuk mund të përcaktojnë nga jashtë dekanin e fakultetit. Këtë mund ta them etikisht, pasi nuk është normale që 85 pedagogëve t’u përcaktohet nga jashtë pasardhësi, nuk është e drejta feudale në universitet. Ne kemi dashur ti japim fund të drejtës feudale të përcaktimit të kandidateve sipas klaneve, grupeve te cilët e dominojnë universitetin. E vetmja beteje është këtu, pastaj politikisht të gjithë janë të shpërndarë, dikush me PD-në, dikush PS-në. Kemi një etikë kolegësh, ku secili ka bindjet e veta.

Pse është dërguar çështja në Ministrinë e Arsimit?  Nuk arrin fakulteti ta zgjidhë çështjen?

Është dërguar sepse KIZ-i ka shpallur kompetencën e vet praktikisht, sepse formula është matematikore dhe të gjithë elementet e formulës janë të sqaruar se çfarë llogaritet aty. Unë mendoj se nuk ke pse ti kërkosh konfirmim ministrisë, pasi është njëlloj sikur unë ti kërkoj ministrisë: A duhet ta konsiderojë numrin 90 të studentëve për universitet si numrin 90? Më jep shpjegim se çfarë do të thotë 90? Është e qartë.

Pse ka pasur kaq shumë polemika dhe tensione në këto zgjedhje?

Unë mendoj se ajo kasa mafioze e universitetit, mafia e tenderëve e kanë bërë dhe herë të tjera. Problemi është shpërndarë nëpër universitete, por këtu vëmendja ka qenë shumë e përqendruar dhe fakulteti jonë është i vogël, ka personalitete të jetës publike dhe këtu ka shpërthyer sistemi i manipulimit. Unë mendoj se është arritur një fitore jo vetëm sepse ka fituar dikush, se mund ta arrinte kushdo nga kolegët tanë, por është testuar se këtu strukturat zgjedhore janë struktura manipulimi, që vota e pedagogeve është manipuluar jo vetëm këtu, por në të gjitha zgjedhjet e tjera nëpër fakultete dhe këtu ka qenë vëmendja më e përqendruar.

Vëzhguesi Valter Meshi: Komisionit i ushtruan presion

Si asnjë herë më parë zgjedhjet për dekan janë shoqëruar me debate dhe polemika. Valter Meshi, student dhe vëzhgues i komisionit ka rrëfyer një tjetër optikë sesi ka rrjedhur procesi. Ai tha për “Shekulli”-n, se anëtarët e komisionit dhe vetë kryetarja kanë punuar nën presion dhe janë detyruar të marrin vendime kundër ligjit. Valteri akuzon drejtpërdrejt pedagogun Mark Marku dhe kandidatin për dekan z.Sabri Laçi, të cilët kanë kërkuar që të quhet vota e vlefshme në një kohë që komisioni e ka gjykuar të pavlefshme, theksoi ai.

Valter, na trego pak sesi ishte procesi i numërimit të votave?

Procesi u mbyll normal diku nga ora katër dhe në fillim kemi hapur kutitë e pedagogëve. Kanë qenë 100 fletë votimi të pedagogëve dhe aty dalin 101 fletë votimi. 81 të votuara dhe 20 të pavotuara, boshe. Fletët e votimit të pedagogëve kanë qenë të ndryshme nga ato të studentëve. Ndërkohë që në kutinë e pedagogëve ishte një fletë studenti me vulën e komisionit të pedagogëve që do të thotë: Një pedagog e ka marrë këtë fletë nga jashtë dhe kur ka votuar, ka marrë edhe fletën e pedagogut dhe i ka lëshuar të dyja në kuti. Kur u numëruan votat dolën 41 vota për Aljula Jubanin dhe 39 për Sabri Laçin, e 40-ta ishte kjo vota e pavlefshme. Për këtë u bë shumë debat. Disa thonin që është e vlefshme. Po si mund të jetë e vlefshme që sipas kodit zgjedhor 37-të, që thotë se vota është e pavlefshme nëse ka formë, ngjyrë dhe përmasa të ndryshme.

Ju thoni se kanë hyrë me forcë në sallën e zgjedhjeve z.Mark Marku dhe z.Sabri laçi?

Ne kërkuam që të dalim 5 minuta pushim dhe në ato momente, ka hyrë Sabri Laçi me Mark Markun dhe me një pedagog tjetër. Ka tentuar vetë Marku që të kapë për fyti kryetaren e komisionit. Disa kanë qenë prezent, ndërsa pala e Aljulës nuk kanë qenë aty. Ne dolëm që të merrnim poshtë një kafe. E kanë parë të gjithë komisionarët dhe dy vëzhgues tonë që ishin aty. Në momentin që kanë hyrë brenda kanë thënë: Urgjent do pranoni votën e vlefshme dhe këtë e dua me procesverbal ka thënë Mark Marku, duke tentuar të kap për fyti Rozana Rushitin. Nga kjo votë varej vendimi. Ne sapo kemi dëgjuar zhurmën jemi ngjitur lart dhe ata kanë dalë nga salla. Në atë moment njëri nga anëtarët propozon këtë gjë: Këtë votë do ta quajmë të vlefshme, sepse duhet të mbajë përgjegjësi i gjithë komisioni, pasi kjo ka ndodh për fajin tonë, është futur nga ne dhe nëse komisioni nuk e mban fajin do të quhet e pavlefshme. Ndërsa komisioni ngaqë kishte marrë presion nga Sabri laçi, thotë: “Po e mbajmë gjithë përgjegjësinë dhe firmosin procesverbalin”. Në orën 1 e 40 ka filluar konsultimi i votës dhe Rozana Rushiti ka thënë kaq: “Kjo votë është e pavlefshme dhe do të mbaj unë përgjegjësi personalisht për këtë, le të shkoj në burg”.

Çfarë presioni ishte ushtruar ndaj kryetares së komisionit znj.Rushiti?

Pranojeni votën, bëjeni të vlefshme ose sonte do të kesh punë me mua- i ka thënë Mark Marku me Sabri Laçin.

Për këtë që thoni keni qenë dëshmitar?

Sigurisht që po. Përfundimisht e kundërshtuan dhe 5 komisionarët e tjerë në momentin që e kundërshtoi kryetarja e komisionit. Neve na ushtruan presion dhe u detyruam që ta bëjmë këtë procesverbal.

Si e provoni ju vërtetësinë e këtij presioni nga Mark Marku dhe z.Sabri Laçi?

Janë 5 komisionerë që e tregojnë këtë të vërtetë. E kanë thënë 100 herë në sy të rektoratit atë ditë. Nga ky debat kërkoi rektorati që të hidhet me votë për të vendosur për fatin e kësaj votë. Ndërkohë që kanë votuar 4 komisionerë që nuk është e vlefshme dhe dy komisionarët e Laçit thanë mos na shkruani emrin, sepse nuk duam të votojmë, ndërsa një ka votuar abstenim. I bie që votat dëshmonin për votën e pavlefshme. As rektorati nuk e zgjidhi dot, por thanë që e kemi dërguar në Ministrinë e Arsimit këtë raport dhe presim një mbështetje nga ajo për votimin.