Fluks raportimesh për dëmet, Avni Ponari: Ku kanë gabuar klientët me sigurimin e banesave

Enida Vërça

Janë mbi 2000 raste të banesave të dëmtuara nga tërmeti i 26 nëntorit, të cilat janë të siguruara në kompaninë “Sigal”. Presidenti i kompanisë, Avni Ponari thotë për “Shekulli”-n se vlerësimi i dëmeve do të bëhet me vlerësues të specializuar. “Janë afro 2000 raste të banesave të raportuara të cilat kanë pësuar dëme nga tërmeti dhe janë të siguruara nga kompania jonë. Fenomeni që vihet re është që këto sigurime janë pothuajse për vlerën e kredisë së mbetur, ky është një gabim i madh i klientëve për sigurimin e banesave tyre”, thotë Ponari në fjalën e tij. Ndërkohë gjatë ditës së sotme, kryetari i Komisionit të Ekonomisë, Arben Ahmetaj në një takim me drejtuesit e shoqërive të sigurimit dhe përfaqësues të AMF-së tha se janë 12 milionë dollarë dëme që duhet të shkojnë në llogari të individëve që kanë siguruar banesat.

Gjatë fjalës së tij, Ahmetaj teksa bëri një bilanc të situatës, tha se 1.943 banesa janë në proces trajtimi nga firmat e sigurimit. Ndërkohë ai i ka kërkuar kompanive të sigurimit që të dërgojnë listat e përfituesve. Rritja e çmimeve Tërmetet e regjistruara muajit e fundit në vend, nxitën qeverinë të hartojë një ligj për sigurimin e ndërtimeve dhe banesave të qytetarëve. Ligji në fjalë detyron që ndërtuesit të mos bëjnë akt shitjeje ndaj blerësit pa garantuar edhe kontratën 10-vjeçare të sigurimit. Sipas kreut të shoqatës së ndërtuesve, Arben Dervishaj në ligj ka ende paqartësi sa i përket zbatimeve praktike të tij.

“Ne normalisht që e kemi kundërshtuar, jo se jemi kundër sigurimeve, por nuk mund të bëhet vetëm me ne, por do të duhet të ishin tre faktor, sepse këtu janë shteti, shoqëria e sigurimeve dhe ndërtuesi, ku normalisht mungon edhe i katërti-qytetari. Nuk flitet për 10 vjet, se ja çfarë do zgjidhim për dhjetë vjet, janë defektet, kur ndërtuesit i kanë mbajtur gjithmonë nën përgjegjësinë e tyre, ose i kanë riparuar çdo defekti qe kanë, edhe pse ka periudha garancie të caktuar për një objekt, por do të ishte më e thelluar që te futeshin edhe qytetarët, sepse car do të ndodh pas dhjete vjetësh, të futej skema e sigurimit të tërmetit, sepse pas dhjetë vitesh mund të bij tërmet, atëherë si i bie?”

Sipas Dervishaj qeveria ende nuk ka bërë publik tavanin e përqindjes së sigurimit duke krijuar një rrezik të blerësit në rritjen drastike të çmimeve të apartamenteve. “Qeveria ka përcaktuar në vendim vetëm, dyshemenë, kur normalisht do të duhej të vinte edhe tavanin. Sepse e gjitha kjo, nëse në fund do të jenë tavanet e larat dhe një kosto që e rëndon ndërtuesin, dhe pastaj do t’ia transferojë blerësit, sepse nëse do flasim për një apartament 100 mijë euro, i bie që të jetë një mijë euro për 10 vjet. Por nuk flitet për një apartament, por mund të ketë 60 apartamente, pra shihet që është një kosto shtesë 60 mijë €uro që do ta bëj ndërtuesi, dhe karshi ndërtimit, me të thënë të drejtën, ka vazhduar rritja e barrave fiskale”.

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/

Leave a Reply

Your email address will not be published. Required fields are marked *

Të tjera

Abissnet