Ekzekutohet 41-vjeçari sarandjot në Bogota, policia s`ka informacione

Nga Nikoleta Kovaçi

Në familjen Lagjaj në lagjen “Qazim Pali” të Sarandës prej më shumë se një jave është hapur morti. Djali i madh i familjes është vrarë. Është vrarë në Bogota të Kolumbisë dhe ende nuk dihet se çfarë ka ndodhur në fakt me jetën e tij. Katër ditë më parë, u tha në media se ishte vrarë një tjetër shqiptar në Amerikën Latine. Një tjetër, pasi prej rreth një viti është rasti i katërt i përplasjeve me viktima dhe të plagosur shqiptarë. Policia e Shtetit bëri me dije mbrëmë se nuk kanë asnjë informacion në lidhje me fatin e atij personi që thuhet që është vrarë. Po ashtu u bë me dije se nuk dihet as nëse është vrarë apo jo, pasi Policia e Shtetit dhe aq ministria e Jashtme nuk kanë informacion në lidhje me shqiptarët që janë jashtë vendi kur vjen puna për vrasje për shkak implikimesh kryesisht në trafik droge. Por sipas të dhënave që vijnë nga burime konfidenciale bëhet me dije se Andrea Lagjaj, 41 vjeç, është ekzekutuar që të martën e datës 3 prill, orëve të vona të mbrëmjes. Burime tregojnë se trupi i tij ende nuk ka mbërritur në vendlindje e për pasojë familjarët janë bashkuar, pasi një pjesë e tyre kanë jetuar prej kohësh jashtë vendi. Lajmi në familjen Lagjaj mësohet se ka mbërritur pak ditë pas ngjarjes së rëndë, ndërkohë bëhet me dije se dyshimet e para bien mbi ndonjë konflikt për shkak të trafikut të drogës.

Në profilin e tij në rrjetet sociale shihet se një foto është e bërë konkretisht në kryeqendrën e vendit më të rrezikshëm në botë për trafikun e kokainës, ku së fundmi kanë hyrë në treg edhe shqiptarët. Andrea (Adriatik) Lagjaj bëhet me dije se është prind i një fëmijë dhe një person i paskeduar asnjëherë më parë në vendin tonë. Madje burimet nga Saranda tregojnë se familja Lagjaj është një nga familjet më të njohura në qytet e për pasojë informacioni i mbërritur për vrasjen e Andreas ka shokuar tub gjithë të njohurit e familjes. Një burim i tha “Shekullit” mbrëmë se askush ende nuk e beson se ai djalë të jetë vrarë aq më tepër për trafik droge. Sipas informacioneve bëhet me dije se në ditët në vijim pritet edhe ardhja e trupi të tij nga Kolumbia e largët dhe e rrezikshme për jetën e shqiptarëve që tentojnë të hynë në tregun e drogës, atë treg dhe atë mekanizëm që duket sikur është pronë e vetëm kolumbianëve dhe jo e kujt tjetër, e sidomos kur bëhet fjalë për kokainën në vendin e tyre.

Kolumbia doli në skenë në vendin tonë pas sjelljes së kontejnerëve me banane po që brenda tyre gjendeshin më shumë se 1 ton kokainë. Malli u nis nga Kolumbia me destinacion një pronar kompanie që tregtonte banane në vendin tonë por që nga ajo ditë, jo vetëm që humbi gjysma e mallit, pronari i mallit por madje policia dhe prokuroria fshehën edhe faktin se ku do të përpunohej gjithë ajo sasi kokaine. Në qeli janë vetëm dy punonjësit, njëri i kompanisë “Garden City” në Maminas dhe tjetri një djalë i ri, shofer i një kompanie tjetër që u porosit të shkonte në port e të bënte lëvizjen e mjetit brenda të cilit gjendeshin më shumë se një ton kokainë, kokainë që në fakt u soll në ambientet e kompanisë. Aty u detyruan të ndërhynin për shkak se thuajse gjithçka ishte e mësuar nga autoritet ndërkombëtare për shkak se DEA kishte gjurmuar mjetin që në nisje e deri në mbërritjen në portin e Durrësit.

Leave a Reply

Your email address will not be published. Required fields are marked *

Të tjera

Abissnet