Biznesi Amerikan kritika qeverisë: Thjeshtëzoni taksat, zgjeroni hartën e Mini-Shengenit

Briselda Hoxha

Presidenti i Dhomës Amerikane të Tregtisë, Enio Jaço i ka dhënë një shuplakë të fortë qeverisë, e cila ka ngelur në vendnumëro për luftën ndaj korrupsionit, zgjidhjen e kontratave të pronësisë apo edhe paqëndrueshmërinë në përcaktimin e taksave. Në një dalje për mediat, Jaço goditi pjesërisht edhe Mini-Shengenin, si iniciativë e lirë ekonomike, por që nuk mund të ketë efikasitet pa përfshirjen e Kosovës.

“Në Shqipëria ka një potencial të jashtëzakonshëm, por klima e investimeve nuk ka qenë shumë e favorshme. Investitorët e kanë pasur të vështirë që të gjejnë në Shqipëri një terren të favorshëm. Por duhet të jemi optimist për ta krijuar këtë në të ardhmen, pasi investitorët e mëdhenj nuk shikojnë vetëm Shqipërinë, por edhe vendet e tjera”.

Sa i përket marrëveshjes së Mini-Shengenit, në emër të AmCham, Jaço e përshëndet për zhvillimin ekonomik që do të mbartë, por e sheh sikundër edhe një pjesë e madhe e ekspertëve, si një koncept të cunguar pa praninë e Kosovës.

“Koncepti është që ne shesim dhe në këtë pikëpamje duhet të marrin pjesë të gjithë, përfshirë edhe Kosova. Produktet shqiptare mund të jenë konkurruese në treg, por duhet të jemi të hapur për vendet e tjera që të vijnë në Shqipëri dhe të konkurrojnë me produktet e tregut”.

Jaço po ashtu foli edhe për nivelin e taksave në Shqipëri, duke përsëritur për të disatën herë edhe ankesën që kanë investitorët për qeverinë.

“Investimet krijojnë mundësi punësimi dhe për këtë arsye duhet një reformë e thellë në lidhje me klimën e investimeve. Korrupsioni pengon shumë investimet e huaja. Taksat po ndryshojnë në mënyrë të vazhdueshme dhe nuk është aspak normale që taksat të ndryshojnë çdo vit. Ka dy probleme me taksat. Shqipëria nuk ka nivel konkurrues në rajon dhe nuk e bën një vend të lirë. Problem është ndryshimi i shpeshtë, i ankimuar shumë shpesh nga investitorët edhe nga ne po ashtu”, tha ai.

Një tjetër problem madhor për klimën e investimeve në vend, për Jaçon janë edhe konfliktet e pronësisë të pazgjidhura, të cilat frenojnë biznesin për të firmosur kontrata të reja për investime.

“Zbatimi i kontratave dhe problematika me zgjidhjen e konflikteve të pronave nuk e ndihmojnë fare biznesin”, deklaroi ai.

Për t’u bërë pjesë e grupit të "Shekulli"
mjafton të klikoni: Join our FB Group dhe kërkesa do t’ju aprovohet.

KOMUNITETI SHEKULLI ONLINE: https://www.facebook.com/groups/1381242728701899/



Leave a Reply

Your email address will not be published. Required fields are marked *

Të tjera

Abissnet